Ceremonia di Bendicion di Cas Parokial Santa Filomena na Paradera

ORANJESTAD (AAN) – Diadomingo 17 di November awo, cu un Santo Sacrificio di Misa,

tabata tin un ceremonia pa bendiciona Cas Parokial di Santa Filomena, na Paradera, celebra pa Pader Toti Fuentebella, y Monsignor Luis Secco.

Monsignor a gradici Dios cu despues di hopi oracion y trabao duro di e fielnan, comunidad, y su persona mes, a bin hunto pa bendiciona e Cas Parokial nobo di Santa Filomena.

“Esaki lo bira centro di nos actividad y formacion  parochial. E lugar aki ta e caminda unda nos por reuni como famia Cristian y duna testimonio di FE, amor, speranza, profundiza nos FE Cristian y reflexiona riba e Palabra di Dios”, Monsignor Secco a bisa.

Seguidamente el a lesa e Palabra di Dios “Carta di San Pablo na e Cristiannan di Efesio” cu ta bisa: “Rumannan, Boso no ta stranhero of bishitante mas, m’awor boso ta conciudadano. E pueblo santo y miembro di Dios su famia. Boso ta parti di un edificio cu tin e apostelnan y profetanan como fundeshi y Cristo Hesus como e Piedra principal. E ta medio di Cristo, henter e structura di e edificio ta pas den otro, e ta crece bira un Tempel Santo di Señor. Uni cu ne, boso tambe ta yuda otro crece p’asina forma un lugar, caminda Dios ta biba, pa medio di Spirito Santo. Palabra di Señor”.

Seguidamente, Monsignor a sigui cu e oracion di bendicionamento di Cas Parochial Santa Filomena y tur esnan cu ta bishit’e.

Tabata presente durante e ceremonia aki Minister Presidente Evelyn Wever-Croes, Minister Xiomara Maduro, diferente miembro di e Cas Parokial y hopi invitado.

Riba combinacion di potret por observa diferente momento di e ceremonia importante aki.