Centro CARTAC a presenta resultado di e investigacion cu a haci riba estado financiero di e entidadnan di Gobierno

Ministro Endy Croes a splica

ORANJESTAD (AAN): Recientemente, Conseho di Ministronan a reuni cu Caribbean Regional Technical Assistance Centre (CARTAC), cual ta un organizacion cu ta brinda asistencia tecnico pa IMF den e region di Caribe.

   CARTAC a haci un invistagacion tocante e estado financiero di e entidad y fondonan publico na Aruba. E meta di e investigacion aki tabata pa mehora e sistema presupuestario y e calculacion di riesgo cu por tin efecto riba e Presupuesto y e estado financiero di Pais Aruba.

   CARTAC a diseña un modelo special pa Aruba pa evalua e sistema financiero di e institutonan semi gubernamental y fundacionnan cu ta subsidia door di Gobierno di Aruba.

   A base di e investigacion aki, Gobierno di Aruba por pone atencion riba e risiconan cu e entidad y fondonan publico por ocasiona pa e Presupuesto di Pais Aruba.

   Na final di e investigacion, Conseho di Ministronan a haya un presentacion amplio di tur stakeholder via Zoom Meeting, unda cu nan a presenta e resultado di investigacion y a duna un recomendacion. Pues, un excelente investigacion, unda cu por uza como guia pa tur entidad cu ta resorta bao di Gobierno di Aruba pa asina haci e miho decisionnan y hiba Pais Aruba den e miho direccion.