Celebracion oficial di Aña di La Reina na Willem de Zwijgerpark

E parke mas bieu na Aruba ta Willem de Zwijgerpark y ta situa den J. G. Emanstraat ( antes Noordstraat) net dilanti di edificio di Corte di Justicia.

E parke ta data for di 6 di September 1938. Na e parti central di e parke ta haya un pilar como un monumento dedica na e 40 añanan di Reinado di Reina Wilhelmina den Reino Hulandes.

Willem de Zwijger tabata e apodo Willem van Oranje I, e tata di Reinado Hulandes.

Ta bon pa menciona cu cede di gobernacion di Aruba e temponan aya tabata situa den e edificio di Corte di Justitia. Mescos cu tambe Raad van Politie, postkantoor y biblioteca

Tur manifestacion cultural manera celebracion di Aña di La Reina tabata tuma lugar na e parke aki. Por corda cu durante aubade Frere tabata para banda di pariba ariba un podium y dirigi e coro di e muchanan di school.

Hendrikstraat ta e caya cu ta core mei mei di e parke y ta nombra na Prins Hendrik casa di Reina Wilhelmina.

Den añanan 70 a traha lugar di para auto den parti banda pariba di e parke y esaki a cambia e dinamica di e parke.

Pa motibo cu un parke asina den centro di ciudad ta wordo yama “ Alameda “ na Spaño y asina e nomber a pega na loke nos tur conoce awe como “ Alameda “.

Foto: Chonai Boekhoudt, Editha Somers-Kock

Compila pa Roberto G. Croes