Cas di Cultura ta bay wordo renoba y lo haya dos seccion nobo extra na e edificio

Renobacion conoci como “E Brasa”

ORANJESTAD (AAN): Durante un conferencia di prensa convoca na Cas di Cultura, Vicky Arens kende ta directora, a divulga cu renobacion di e lugar ta bay cuminsa.  Na final di tur e trabao aki, Cas di Cultura lo bay ta mas grandi cu dos pida extra construi tanto banda pabao, y tambe banda pariba.

   Cas di Cultura, Aruba su centro cultural nacional di teatro y educacion cultural desde 1958, a revela oficialmente su proyecto di renobacion tan anticipa, cu nan ta yama “E Brasa”.

   Invitadonan y prensa tabata e promenan pa presencia e plannan ambicioso pa modernisa y expande e institucion cultural principal di e isla, mientras ta conserva su fachada y escenario historico.

   A gradici Minister demisionario di Cultura Xiomara Maduro pa a confia den e proyecto y wak e balor di e plan pa Aruba. A anuncia tambe e prome fase di renovacion cu lo cu lo regarda e parti meymey, esta monumental di e edificio. E evento tambe a estrena di e video di crowdfunding di Cas di Cultura, primordialmente pa e mercado Hulandes cu lo circula via e plataforma Voordekunst pa stimula Arubiano na Hulanda y amantenan di Aruba pa tambe contribui na e causa bunita aki.

   Na Aruba tambe lo tin un periodo di 6 luna di recaudamento di fondo cu lo termina den un evento publico na September 2025.

   Su motivacion: A ser treci dilanti, cu e motivacion tras di e renobacion aki ta profundamente ancra den crecemento y sostenibilidad cultural di Aruba.

   E renobacion lo sirbi pa stimula e industria creativo local door di modernisa e teatro y e resto di edificio, sigurando cu e ta sirbi e actornan, artistanan, y profesionalnan cultural di Aruba di un manera mas al dia y moderno. E transformacion lo contribui na e desaroyo continuo di e sector creativo riba e isla.

   Un otro aspecto clave di e renobacion ta e mehoracion di e programacion educativo. Door di fortalese partnershipnan cu institutonan educativo, Cas di Cultura tin como meta pa amplia oportunidadnan di siñamento y trece variacion mas grandi na educacion di arte y cultura di Aruba. Adicionalmente, e renobacion lo atende e aspectonan logistico, infrastructural y tecnico anticua di e teatro, treciendo mehoracion cu sostenibilidad den mente.