Carusel di profesion pa alumno di Colegio Arubano tabata bon bishita

Siman pasa mas di 300 alumno a asisti e anochi di informacion tocante profesion organiza pa WeConnect den colaboracion cu e decano di Colegio Arubano.

Durante e anochi aki e alumnonan di e klasnan superior di HAVO y VWO a haya oportunidad pa ricibi mas informacion tocante diferente profesion y kico cada un ta encera.

   Meta di e anochi informativo, un sorto di carusel di profesion, ta pa sostene nos alumnonan den nan escogencia di un estudio y pa nan futuro carera. Tabatin mas di 30 profesional boluntario pa informa e alumnonan di Colegio Arubano tocante e contenido di nan trabao.
   Informacion: E fundacion educativo WeConnect ta compromete su mes pa asisti den duna un miho preparacion pa un futuro estudio, cuminsando na scol.

   “Nos por nota cu ta basta dificil pa e alumnonan di Aruba haci un escogencia specifico pa un estudio na Hulanda. Un profesional entusiasma, cu ta comparti tocante su trabao, por informa y inspira un otro”, Tanja Fraai, directora di WeConnect, ta splica. E carousel di profesion aki ta parti di un serie di informacion mas amplio di WeConnect, tanto na Colegio Arubano, como na otro scol na Curaçao y Sint Maarten tambe.  
        
   Profesional dilanti klas: Pa e carusel di profesion tabatin experto for di diferente ocupacion presente pa brinda informacion. Esaki a permiti e alumnonan scucha experiencia di e profesionalnan for di industria di turismo, sector medico y di e campo di sciencia di tera, entre otro. Pero a trata tambe criminologia, finanza y ley.

   Inspiracion: Un alumno entusiasma cu a ricibi informacion for di Ruthlyn Lindor, kende tin un master den criminologia y cu ta traha na Oficina Central Nacional di Contraterorismo, Siguridad y Interpol na Aruba, a bisa: “Criminologia mi a haya hopi interesante y con e juffrouw a papia tabata yen di energia y no laf.”

  Ruthlyn Lindor mes ta bisa tocante e anochi aki: “Mi a studia criminologia, pasobra mi kier haci un diferencia den sociedad. Mi ta feliz cu tur locual mi a haci y logra cu mi master. Pero anochinan manera esaki ta locual realmente ta cende e chispa den mi curason. Pa wak tur e wowonan briyante, mientras mi ta splica tur loke ta come y bebe den un estudio di criminologia y den e trabao di un criminologo. Mi ta spera di por a inspira futuro criminologonan.”

   Necesidad: Den e encuesta cu e alumnonan por a yena via nan telefon despues di nan bishita, 53% a indica cu nan a haya mas informacion pa por determina nan escogencia di carera. Varios alumno a señala tambe cu nan mester di mas tipo di anochi di informacion tocante profesion asina, pasobra e ta yuda nan dicidi e direccion cu nan kier bay aden. “Un bon señal pa nos, pa nos sigui brinda e tipo di informacion aki tocante escogencia di profesion”, e director di WeConnect, Tanja Fraai, a bisa na final.   E potretnan aki pa cortesia di WeConnect.