'Carnival Street Party' den Caya Grandi pa duna inicio na e temporada di Carnaval 69

ORANJESTAD (AAN):  Temporada di Carnaval 69 a habri oficialmente riba 11-11, esta diabierna ultimo cu un tremendo ambiente den Caya.

E evento aki a carga e nomber 'Carnival Street Party'.

            SMAC ta masha contento di por a organisa e evento exitoso aki pa asina Aruba completo por a celebra 11/11 den grandi.

            Riba e dia aki, exactamente pa 11:11 di mainta di 11 di november 2022, SMAC hunto cu RBC Bank a inicia e temporada di Carnaval 69 y a lansa e jingle oficial, componi pa e legendario Ruben Scorpio Garcia (dfm) y canta pa Freddy Rasta.

            Den oranan di anochi den Caya G.F. Betico Croes pa 8:00 pm di diabierna, e prome agrupacion musical a subi escenario y despues Presidente di SMAC, Darren van Ommeren hunto cu su directiva a honra Ruben Garcia (dfm) den presencia di famia Garcia cu a ricibi e reconocemento aki.

            E anochi aki a conta cu ambiente di brassband, Dj’s,  gruponan di carnaval, y publico carnavalesco.