LONDON: National Crime Agency (NCA) na Inglatera, a confirma cu nan a logra di intercepta un cargamento basta grandi di droga den Port London Gateway.
E peso total ta di mey ton di cocaina procedente di Colombia, y cu tabatin Hulanda como destino final.
E lote di 500 kilo di cocaina aki tin balor di 48 miyon Dollar, y tabata scondi mey-mey di un cargamento di bacoba cu e barco tabata transporta.
E droga a wordo descubri Diamars siman pasa den centenares di paki poni hunto cu e frutanan aki den cahanan di carton, segun e Director of Operations di NCA, Adam Berry, a bisa.
El a bisa cu esaki sigur ta un golpi fuerte pa e narcotraficantenan. “Pa localiza un transporte di e tamaño aki, ta un golpi importante riba e red criminal envolvi, y ta stroba nan di gana miyones cu e crimen aki.”
“Droga manera cocaina ta wordo usa pa bandanan criminal ta envolvi nan mes den actonan violento y di delincuencia den nos comunidadnan. Pesey hayazgonan manera esaki ta demostra con nos por kibra e relacion aki entre cartelnan internacional di droga, y e bendedornan di droga riba caya,” Berry a bisa.
