SANTO DOMINGO: Diadomingo anochi banda di 8:00 pm a yega na Republica Dominicana,
un avion militar Canades cu a trece mas di 23.500 kilo di equipo, herment, y tecnologia avanza pa coopera cu e rescate di dos homber cu tin mas di un siman atrapa den ‘Cerros de Maimón’.
Desde siman pasa caba, mas di 70 persona ta trahando constantemente pa trata di habri canal pa por yega cerca e dos personanan cu a keda pega den e mina conoci como ‘Cerros de Maimón’ cu ta situa na provincia Monseñor Nouel.
Loke a yuda hopi ta cu cada empleado di e compania di mina tin un ‘localizer’ riba nan curpa ta cana cune. Pues tabata facil pa por a haya sa exactamente na unda y con hundo nan dos ta.
Nan a keda pega despues di un derumbe cu a blokea nan salida. E minero Gregory Alexander Pérez (Dominicano) y Carlos Yepes (Colombiano) tabata hunto cu 70 otro trahador den un di e tunelnan di e mina cu ta midi 6.5 meter hancho y 6 meter halto.
Na e minanan aki tin un total di 554 empleado, y e compania ta dedica pa saca zinc y koper for di bao tera.
E equiponan cu Canada a manda tabata un boormachine Cubex modelo 6200 cu ta pisa mas di 11.300 kilo cu su mast, y un Cubex R-110 Booster.
