Atrobe e structura di entrada di empleado publico ta bini dilanti
*Ripiticion di mitar BBO pa haya voto, lo costa futuro di Aruba
*Personal sector priva no por paga pa privilegio aparato publico
ORANJESTAD (AAN) — Empleado publico no ta e unico trahador of instancia cu a sufri perdida na man di e crisis mundial, cu a afecta entrada di pais y hende.
DIARIO tabata sumamente contento ora luna pasa a wordo anuncia cu e empleadonan publico lo a recupera un parti di e placa cu nan no a ricibi na 2022 y cu na 2023 e resto lo wordo poni atrobe riba nan salario.
Un promesa sumamente alentador pasobra esey ta nifica cu e empleado publico por haci mas gasto cu lo beneficia comercio y finalmente beneficia e caha di belasting di Aruba.
E pregunta grandi ta, si den e situacion mundial actual, Aruba por alcansa compromisonan financiero cu resultadonan pa e pais y tur pagador di belasting.
E bienestar nacional di Aruba ta wordo sirbi? Esaki ta e contesta cu mester por wordo duna na e pais cu na e momentonan aki ta den un situacion financiero sumamente peligroso.
Pa cuminsa situacion financiero di un pais ta depende di e trankilidad mundial y nacional, cu no ta presente na e momentonan aki.
Mundo ta na guera y te awe ningun hende ta na haltura kico lo pasa finalmente. Un cos ta sigur, paisnan grandi ta trata di haya solucion pa nan situacion den un caos mundial total y ta evita di hinca nan mes den compromiso.
Politica populista ta uno di e pio enemigonan di futuro di Aruba na e momentonan aki.
Sindicatonan cu ta dirigi trahadornan, cu den e gran mayoria di caso, a bay bon school, ta na haltura cu nan ta exigi placa cu no tin.
Aruba no por ripiti e wega politico di deshaci di mitar BBO pa haya voto. Aruba na e momentonan aki no por duna su empleadonan mas compensacion, mientras Aruba ta den un situacion serio.
Nos ta aplaudi cu turismo ta yuda Aruba na e momentonan aki tene su cabez riba awa. Ta lubida, sinembargo cu turismo ta un industria sumamente peligros y cu ta basha abou pa cualkier movecion inespera na mundo.
Den e realidad mundial, turismo ta keda algo pa sigui di dia pa dia ya cu guera y terorismo ta algo cu mas ta impacto turismo.
E situacion financiero mundial tambe ta di preocupacion cu medidanan general cu gobiernonan a introduci pa frena inflacion pero tambe pa mira con ta landa den un lama sumamente bruto di incertidumbre total, cu ta enemigo di economia y bienestar financiero.
Ta keda tambe un parti moral. E trahadornan di Gobierno ta atende cu Gobierno di acuerdo cu un structura di compensacion pa cual nos tin basta tempo ta adverti.
E hecho cu Gobierno ta consisti di politiconan cu mester haya voto, ta haci cu ta dificil pa Gobierno introduci medidanan, cu trahadornan den sector priva si conoce.
Cuanto trahador den cuanto empresa a haya aumento di salario ultimo tempo? Cuanto trahador den cuanto empresa ainda ta biba cu un salario reduci? Cuanto trahador den cuanto negoshi, ta haya nan retiro?
E grupo mas grandi di trahador cu mester paga belasting, ta den un situacion mucho mas penoso cu e trahadornan di Gobierno, cu por baha di poder loke den empresa priva no ta posibel.
Aruba ta den un situacion sumamente critico. Falta 227 Miyon pa cera presupuesto, cu ta calculacion di gasto y entrada. Aruba tin un debe di 6 Biyon pa paga.
Mientrastanto kico ta e gastonan nobo cu por bati na porta di Aruba? Sumanan nobo pa confronta Monkey Pox y Polio? Sumanan nobo pa cualkier calamidad cu pasashi di un ola tropical por trece cune?
Cuanto placa Aruba ainda por perde si e situacion mundial actual continua y afecta turismo y afecta economia nacional?
Na 2009 Aruba a wordo entrega na fayo, na kiebra di su futuro. Awe mester ripiti e wega pa politiconan haya voto?
Si Aruba tin tanto debe, con e por paga reparatietoeslag na ambtenaarnan mientras den sector priva empleado pober no sa cuanto tempo mas cuminda lo subi mesa?
E forma pa deshaci di e imperialismo di e aparato publico ta, pa revisa e leynan cu ta dicidi riba entrada di trahadornan di gobierno. Pero cual politico lo hacie si e tin chens di exigi hopi voto?
