Señora Romely Flanegin:
ORANJESTAD (AAN): E responsabilidad di cuida nos muchanan durante actividadnan di Carnaval ta primordialmente di cada mayor. E responsabilidad aki ta cuminsa for di momento cu un mayor evalua si ta adecua pa expone su yiu baby of mucha chikito na e eventonan aki. Señora Romely Flanegin, Director di Tienda di Educacion ta splica cu, conhuntamente cu Comision Vision Pedagogico Aruba, Tienda di Educacion ta haciendo e campaña ‘Carnaval Safe pa tur Mucha y Hoben’.
E meta di e campaña ta pa conscientisa mayornan cu e mucha y hobennan mester keda central den e temporada aki di gozo y percura cu nan ta safe. Señora Flanegin a remarca cu pa e muchanan mas chikito, nan conscientisacion ta enfoca riba e parti di come, bebe y na ki edad ta adecua pa hiba un mucha Carnaval. Esaki no ta un topico nobo, sinembargo, ainda mayornan ta hiba hasta babynan Carnaval, cu segun e, no tin un beneficion pa un mucha chikito of baby. Mas bien, e factornan di riesgo ta hopi mas grandi pa muchanan chikito cu ta wordo exponi na solo fuerte y musica duro. “Nos ta un cultura cu ta goza di Carnaval pero nos mester keda responsabel como mayornan”, el a enfatisa.
Pa termina su entrevista cu DIARIO, señora Flanegin a remarca cu tin diferente luga unda por laga muchanan chikito pa asina no expone nan na entre otro solo fuerte y decibel halto y alavez ta haya un bon cuido mientras mayornan ta goza di Carnaval. Fundacion Tienda di Educacion lo publica un lista di e luganan aki riba nan paginanan social.
