Señora Derchlien Dijkhoff di Ban Serio!:
ORANJESTAD (AAN): Sigui Briya ta e lema di campaña cu Ban Serio! a introduci pa e aña aki enfocando riba e manera di comportacion di cada ciudadano y reconoce e impacto cu nos tin, no solamente durante e temporada di Carnaval sino durante henter e aña.
Señora Derchlien Dijkhoff di Ban Serio! a splica cu pa e temporada di nos fiesta cultural mas grandi, e campaña Sigui Briya ta encera entre otro, pa bay bek cas cu tur loke bo hiba na e actividadnan; respeta otro; cuida nos muchanan; cuida nos grandinan. Ta hunto nos ta mantene loke ta di nos na nos curason y mantene nos cultura.
Tambe, el a agrega, cu mescos cu aña pasa, Ban Serio! y Aruba Tourism Authority (ATA) ta haci donacion di saconan di sushi pa asina yuda esnan cu ta haci e trabao aki cu material pa mantene nos isla limpi. Otro parti di e campaña ta ‘Turismo responsabel’. Nan mensahe ta pa uza material recicla pa dorna disfras di Carnaval pa mustra nos bishitantenan con responsabel nos ta riba e tema di reciclahe.
Señora Dijkhoff a splica cu pa e rutanan di Carnaval, nan lo ta dos ora prome cu e parada cu nan ‘Ban Serio! Station’ na unda nan lo haci muchanan y participantenan mas bunita cu nan glitter biodegradable.
“Ban celebra nos dushi Carnaval consciente y decente y corda riba e manera di comportacion un na otro den e temporada aki y riba bo impacto riba esnan rond di bo”, señora Dijkhoff a expresa.
