Camp2024 di CB Noord a mustra muchanan con ta pisca na baranca

Fenomenal idea pa esnan den vakantie camp

ORANJESTAD (AAN): Vakantie a cuminsa, y mesora esnan di Centro di Bario Noord a organiza nan ‘Camp2024’ cu na opinion di varios persona, ta uno cu a inclui hopi sesion interesante pa muchanan haya sa di dje di trempan caba.

   Ademas cu a haya curso di con pa duna CPR y tambe informacion di Cuerpo Policial, DIARIO a tuma nota cu e muchanan aki di Camp2024 riba Dia #4 a ricibi un presentacion diferente.  A laga un piscado local bay duna e muchanan un guia, ta con bo ta haci pa bay pisca na baranca.

   E tabata un presentacion di Eduard Dirks, y loke DIARIO a tuma nota di dje ta cu el a hala masha hopi atencion mes.  El a presenta cu tur sorto di material, e.o. linja di pisca, anzue, chumbo, y tabatin un taray tambe.

   Dirks a bay poco-poco riba aspecto ta con ta pisca na baranca, y a mustra con nos Arubianonan semper tabata haci esey.  Muchanan a para rond di dje pa asina mira e material riba mesa, y tabata vigila cu interes con e piscado ta duna un splicacion cu sigur a atrae atencion total di e muchanan.

   Tambe el a bay pafo riba veld di volleyball di Centro di Bario Noord, pa asina mustra con ta lora un taray, y tambe con ta zwaai esaki.  Varios mucha a haya chens di purba zwaai esaki.

   Sigur un palabra di pabien na e organizadornan cu a sa di usa e chens unico aki pa mustra nos futuro generacion riba e importancia di pesca, y cu por sigui inculca esaki den nan.