ORANJESTAD(AAN)— Den Ley e exigencianan pa un persona por participa na eleccion pa Parlamento ta hancra. E exigencianan aki ta basa nan mes riba Constitucion di e pais pero tambe riba ley di logica.
Cambio di normal di comunidad a afecta e exigencianan electoral tambe. Cu ki edad un persona ta mayor di edad? Cu ki edad por permiti un persona saca un rijbewijs? Cu ki edad un persona por vota?
Contestanan cu a cambia den transcurso di Siglo 20 cu a crea conceptonan nobo pa e responsabilidad cu cada persona por carga a base di e preceptonan social.
Durante Siglo 20 e fenomeno di edad riba tereno social a produci e concepto di “teenager”. Na ki edad un persona ta wordo reconoce como un ciudadano di edad avansa a cambia hunto cu edad di pensioen di behes.
Ta durante Siglo 20 por mira cambio den e posicion di hende muhe, cu a wordo considera apto pa por bira gerente y traha tur trabou y a haya derecho di voto y representacion den gobernacion.
Cambionan social a presenta nan mes den transcurso di tempo pero cambio den responsabilidad cu tareanan ta contene, si no a conoce cambio y esaki sigur ta e caso riba tereno di funcionnan politico cu a wordo crea pa un pais por wordo goberna.
Na Siglo 20 por mira e aceptacion di damanan den puestonan importante loke a nifica mas dama den politica y awe hasta un dama como Prome Ministro di Aruba despues di basta tempo cu damanan a demostra cu nan ta capaz na dirigi un empresa.
Pa loke ta trata edad, por mira un diferencia. Semper tabata tin hende cu for di un edad hoben a dirigi un empresa of pais, dependiente di naturalmente e edad mas abou cu tabata conta pero tambe nan capacidad personal.
Politica a conoce cantidad di persona mundialmente cu a cuminsa nan carera na un edad tempran y a keda den politica pa resto di nan bida.
Rasa y religion na un pais democratico hamas por ta motibo pa vota. Si esaki ta un hecho, no por papia di un pais cu gobernacion democratico.
Den asunto di vota pa un pais, nada mas por conta cu si e persona ta apto pa dirigi su pais segun e huramento of promesa cu e mester haci.
Pues ningun persona ta dirigi un pais a base di su interes of interes di su grupo. Tur persona cu acepta un luga den Parlamento di Aruba mester haci esaki a base di loke ta e interes di henter Pueblo di Aruba, acepta den e condicionnan constitucional pa ciudadanan.
Hoben of anciano, homber of muhe, tur rasa y tur religion mester sirbi interes di henter Pueblo den Parlamento, cu mester wordo maneha manera un cabez di famia responsabel ta maneha su famia y manera un bon gerente ta maneha su pais.
Pa haya voto naturalmente tin cierto practica. E interes di hobennan no ta wordo semper sirbi dor di personanan cu un edad cu ta pone nan califica como hoben. E interes di dama no ta wordo semper sirbi dor di dama y asina por sigui.
Tur persona tin mas cu un interes.
Un Pueblo mester vota pa e personanan cu por carga responsabilidad di gobernacion na interes di henter e pais. Un gobernante mester reconoce tur sector y tur grupo di un comunidad cu e ta sirbi den su totalidad.
Esaki ta haci cu no por trapa riba interes di ningun grupo of hende den comunidad ora ta parti di Parlamento, Gobierno of Husticia, e tres partinan di un solo gobernacion cu e pais conoce.
Honestidad, integridad, moral, capacidad basico pa ta un gerente di un pais, mester wordo busca na urna electoral cu no conoce discriminacion den democracia.
Den Parlamento, den aparato hudicial y den Conseho di Ministro un solo interes por ta presente cu ta e interes di tur Arubiano y di Aruba cu politiconan ta hura di lo sirbi.
