Borchinan informativo a wordo renoba

A.T.A. ta haci apelacion na comunidad di aruba pa cuida naturalesa y borchinan: 

ORANJESTAD (AAN)- Recientemente Aruba Tourism Authority a tuma nota di varios borchi cu a wordo destrui den nos naturalesa.

            Algun aña atras A.T.A. a percura pa borchi cu diferente mensahe a wordo pone na diferente caminda di Aruba -mas tanto den areanan bishita frecuente door di nos bishitantenan- pa entre otro adverti pa cuida nos naturalesa pero tambe cu informacion di e luga unda e borchinan a wordo poni. Por ehempel si tin peliger pa landa den e area respectivo.

            Ta un lastima pa mira con algun ta wordo destrui, siendo cu e borchinan ta refleha un mensahe cu informacion importante y clave tin biaha hasta di nos historia y herencia cultural.

            Pa A.T.A ta importante pa inverti den puntonan di interes riba nos isla y asina facilita bishitantenan y localnan cu e informacion.

            E proceso pa cu e borchinan aki ta rekeri data corecto pero tambe creatividad, pa asina duna informacion veridico y corecto na esnan cu ta frecuenta e luganan unda e borchinan a wordo poni.

            Pa tal motibo ta pidi tur esnan concerni pa cuida e borchinan cu no ta solamente pa e bishitantenan pero tambe pa nos comunidad.

            A.T.A. den su esfuersonan pa enrikece e experiencia di nos bishitantenan internacional durante nan vacacion riba nos isla, ta yuda na engrandece e experiencia door di entre otro e borchinan aki. A.T.A. a inverti den borchinan indicando por ehempel den cual direccion por haña mas actividad y cu ta duna guia pa yega na otro puntonan di interes. Tambe borchinan cu ta indica e seguridad cu cada un di nos mester tuma pa cu precaucion entre otro pa loke ta trata e pandemia global actualmente. Tambe tin borchi cu informacion di monumentonan.

            E desaroyo di e producto Aruba como destinacion turistico ta un prioridad halto riba A.T.A. su agenda. Esaki ta rekeri hopi dedicacion, y sigur atencion na tur loke nos por ofrece na nos bishitantenan manera nos cultura, historia y experiencianan autentico. Corda cu hunto nos tur por logra pa nos isla keda uno bunita y placentero pa nos tur, e localnan y nos bishitantenan.