Boneiro awor ta conecta riba kabel submarino nobo

SETAR, un di e iniciadonan di kabel CELIA

ORANJESTAD (AAN):  Den 2027 Boneiro lo ta conecta riba e kabel di fiberglass submarino CELIA. Cu esaki internet mas rapido, safe y stabil ta bira posibel. Pa esaki Saba Statia Cable System BV (SSCS) a firma recientemente un acuerdo cu e compania Arubano di telecomunicacion, SETAR, un di e iniciadonan di kabel CELIA. SSCS a haci esaki na nomber di Gobierno Central, cu ta 100% accionista di SSCS.

Conexion riba e kabel submarino ta bon noticia pa usuarionan di internet na Boneiro. E inversion ta importante pa suministro di servicio digital nobo di gobierno. E kabel di velocidad halto ta brinda oportunidad na suministradonan di telecomunicacion y por contribui na un miho balans entre calidad y prijs di internet pa tur hende. Cu e conexion nobo aki Boneiro ta bira menos dependiente di kabelnan submarino y rednan mas bieu. 

Consorcio

CELIA (Caribbean ELite Alliance) ta un consorcio di diferente compania di telecomunicacion cu ta activo den e area Caribense. E kabel di velocidad halto, cu segun plan mester bira operacional den e di tres trimester di 2027, ta conecta Aruba, Martinique, Antigua, Puerto Rico y Boca Raton na Florida. E kabel di fiberglass lo tin un capacidad halto y lo haci transferencia rapido di dato posibel.

Puntonan di lansa

Conexion di Boneiro riba kabel di CELIA ta haci internet mas rapido, confiabel y barata, posibel. Miho servicio digital, desaroyo di e economia y independencia ta puntonan di lansa di gabinete.
“E kabel nobo di internet CELIA ta un bon noticia pa e islanan den Caribe," ta bisa demisionario secretario di estado Eddie van Marum for di Ministerio di Asunto Interno y Relacion di Reino (BZK), cu ta responsabel pa Relacion di Reino y Digitalisacion. "E kabel aki lo duna internet mas rapido y miho pa hende y kompania. Esaki ta esencial pa desaroyo economico di e islanan. Inversion den conexion digital ta un punto importante pa e gobierno pa crea bienestar y empleo.” 

Conexion digital

Conexion digital entre e islanan ta importante, director di SETAR, Roland Croes, ta bisa. ‘Inversionnan manera CELIA ta garantisa conexion di e islanan cu e red global di dato y ta contribui na desaroyo economico. Cu instalacion di CELIA nos a inclui posibel expansion pa otro islanan, pa asina nos islanan no keda isola di desaroyonan tecnologico y por participa na e mundo global di dato. 

Barco di investigacion marino

Preparacion pa instalacion di e kabel submarino a inicia. Den e ultimo siman di augustus por mira un barco di investigacion marino dilanti costa di Boneiro. E barco lo nabega entre Aruba, Corsou y Boneiro y lo traha un mapa detaya di fondo di laman cu ekipo di sonar avansa.

Traha mapa

‘Pa por instala un kabel submarino, prome mester visualisa e fondo di laman a lo largo di e ruta cu exactitud, pa loke ta trata profundidad, diferencia den elevacion, coral presente, ruina di barco y/of otro material. Relaciona cu esaki nos ta laga entre o.a. Stinapa Boneiro, Rijksdienst Cultureel Erfgoed y Rijkswaterstaat conseha nos. A base di e investigacion marino aki lo determina e ruta definitivo di e kabel riba fondo di lama’, Werner Haan, director di SSCS ta bisa. 

Den 2027 no ta solamente amplia kabel CELIA pa Boneiro, pero tambe pa Corsou. Pa esaki SETAR y Corsou a firma un acuerdo anteriormente e aña aki. Pa medio di un subsidio di Union Europeo for di e CEF Digital Fund ta yuda realisa e proyecto. 

E barco di investigacion marino, StatiaBorg di JW van Stee mara na Sint Eustatius / Wagenborg foto.