Bingo special pa yuda renoba Bonaire Club a worde cambia di fecha

Awe ta 84 aña cu Union Mutualista Boneriano a wordo funda

ORANJESTAD (AAN): Henter e compleho di Bonaire Club na San Nicolas mester di un renobacion.  E comision encarga cu esaki a organiza un Fundraising Bingo pa asina yuda cubri gastonan enorme cu esaki ta encera.

   E Bingo aki tabata uno cu ta pasa via TV, door di DIARIO TV.  Sinembargo debi na dificultad imprevisto, e organizadornan a cambia e fecha.

   E tabata programa originalmente pa tuma lugar Diasabra 9 di Juli cu a pasa.  Pero awor el a haya un fecha nobo, cu ta Diasabra 27 di Augustus 2022.

   Si abo ya tin bo carchinan di Bingo, tene cuenta cu e ta keda valido pa e fecha nobo di 27 di Augustus.  Bo por mira e wega via Diario TV.  Esnan cu ta desea di haya carchi, por contact 641-6029.

   Algo fenomenal ta e hecho cu awe ta cumplí 84 aña cu 70 Boneriano biba na Aruba (cu tur nan lombrishi dera na Bonaire), a funda un asociacion cu e nomber ‘Union Mutualista Boneriano’.

   E meta cu e 70 Bonerianonan tabatin ta pa trece union, y claro por mira con e asuntonan a desaroya di epoca pa epoca.  E cambio di mentalidad di cada epoca a wordo adapta y e club a sigui haci esfuerso pa bay dilanti.

   Un sigur, hopi danki na e 70 Bonerianonan cu a traha hunto pa lanta e Union Mutualista Boneriano (UMB) cu a hasta yuda traha Bonaire Club na San Nicolas.

   Awor nan mester di yudanza pa drecha e lugar aki y pone bek den bon condicion.  Yuda cu e Bingo pa asina e por bira bek e joya di edificio cu e tabata semper.

   Tambe por mira e parti di renobacion di e cura di Bonaire Club tambe.