Bestaansminimum di un famia na Augustus na Aruba a subi cu 36 Florin

Indice di Prijs di Consumo pa luna di Augustus 2021

ORANJESTAD (AAN): E siman aki, Oficicina Central di Estadistica a presenta e Indice di Prijs di Consumo (CPI) pa luna di Augustus 2021, y esey ta 98.84, loke ta representa un subida di 0.3% compara cu e indice di Juli 2021 (98.53) y acumulando un subida di 1.8% te cu na Augustus di e aña aki.

   E cambio di e CPI pa e ultimo diesdos lunanan (Augustus 2020 te cu Augustus 2021) ta 1.4%, un subida di 3.9 punto di porcentahe (ppt) compara cu e periodo corespondiente di aña pasa (-2.5%).

   E promedio anual di e tasa di inflacion pa e periodo di Augustus 2020 te cu Augustus 2021 ta -1.1%, un caida di 2.0 ppt compara cu e 0.9% registra den e periodo di Augustus 2019 te cu Augustus 2020.

   Durante e luna aki, 7 di e diesdos sectornan a registra subida di prijs. E subidanan cu tabata tin e mayor efecto riba e CPI a worde registra pa e sectornan di “Mobilario” (1.7%) y “Restaurant y hotel” (2.7%), causando un efecto di 0.15 y 0.13 ppt. E subidanan den e restante sectornan a contribui cu un efecto di 0.34 ppt riba e CPI di Augustus 2021.

   E subidanan aki a worde contraresta parcialmente door di caida den e indice di e sectornan di “Vivienda” (-0.6%) y “Paña y Zapato” (-3.6%) cu a contribui cu un efecto di respectivamente -0.15 y -0.09 ppt riba e CPI di Augustus 2021. E caidanan den e restante sectornan a contribui cu un efecto di -0.07 ppt riba e CPI di Augustus 2021.

   E subida den e sector di “Mobilario” a worde causa door di principalmente subidanan den e categorianan “Herment y ekipo pa cas y hardin” (16.9%) y “Mueble y accesorionan, tapijt y otro tipo di material pa vloer” (8.0%), causando un efecto di 0.10 y 0.08 ppt, respectivamente. E subida den e sector di “Restaurant y hotel” a worde causa principalmente door di un subida di 150.4% den e categoria “Servicio di alohamento”, causando un efecto di 0.09 ppt.

   E caida den e sector di “Vivienda” a worde causa principalmente door di un caida di 2.7% den e categoria “Mantencion y reparacion di vivienda”, causando un efecto di -0.15 ppt. E caida den e sector di “Paña y sapato” a worde causa door di principalmente un caida di 3.8% den e categoria “Paña”, causando un efecto di -0.08 ppt.

   Canasta di consumo:

   E canasta di consumo di e CPI ta consisti di 408 bienes y servicionan. Compara cu 2021, 46.6% di e bienes y servicionan aki a conoce un aumento di prijs causando un efecto di 1.27 ppt, mientras cu 37.7% ta mustra un caida di prijs, cu a contribui cu un efecto di -0.95 ppt y pa e restante 15.7% no tabata tin cambio den prijs.

   Prijsnan di bienes a subi cu 0.4% y a causa un efecto di 0.23 ppt. Prijsnan di servicionan a conoce un subida di 0.2% y a causa un efecto di 0.09 ppt riba CPI di Augustus 2021.

   Core inflation:

   E asina yama CPIC (core inflation) - CPI excluyendo e efecto di energia y cuminda - a registra na Augustus 2021 un subida di 0.2%.

   E indice di energia (cu ta consisti di e productonan: electricidad, awa, gasolin y diesel) a registra un subida di 0.6%. E indice di cuminda a registra un subida di 0.7%.

   Bestaansminimum:

   E bestaansminimum pa un hogar consistiendo di dos (2) adulto y dos (2) mucha (edad 0-15 aña) na Augustus 2021 ta Afl. 4,817.  Esey ta un subida di Afl. 36 compara cu Augustus 2020 (Afl. 4.781).

   E bestaansminimum pa un hogar di 1 adulto ta Afl. 2,294.  Esey ta un subida di Afl. 18 compara cu Augustus 2020 (Afl. 2.276).