Becadonan rumbo pa exterior tin di corda bay schrijf-uit di Censo

Solange Tchong, PR di AZV:

• AZV ta stop bo poliza automaticamente
• Pa e sigui core te dia bo subi avion tin un proceso 

ORANJESTAD (AAN) Relacionista Publico di AZV, señora Solange Tchong den entrevista cu DIARIO a duna informacion pa studiantenan cu ta bay studia den exterior, tocante e cancelacion di nan carchi di AZV.

   “Semper, tur aña, nos cu Departamento di Enseñanza, door di manda nan un flyer di AZV, pa informa studiantenan kico ta e miho manera pa nan haci. T’asina cu e aña aki ta bay ta igual. Nos tin un flyer prepara pa manda e studiantenan. Departamento di Enseñanza ta colabora cu nos, ta duna nan informacion y mas importante ta cu nan tin cu corda cu nan tin cu cancela nan nomber for di Censo (Schrijf uit), y e informacion aki  AZV lo ricibi automaticamente door cu nos tin un conexion directo cu Censo”, Solange Tchong a comunica.

   Locual AZV ta pidi e studiante ta cu si e kier keda asegura e otro dianan cu e ta keda ainda na Aruba, pendiente di su biahe pa sali, e ora ey ta importante pa e manda AZV su ticket di biahe, y tambe un copia di su passport via email anto e ora ey por percura pa e studiante su poliza di AZV keda te cu e ultimo dia, e dia cu e ta subi avion.

   Solange Tchong a indica cu tin studiante cu asina tin tur preparacion cla pa bay afo, na cierto momento ta dicidi cu e no ta bay studia afo mas, y ta dicidi cu ta studia na Aruba toch, locual a yega di sosode den pasado, of por ehemplo studiante cu ta enfrenta un crisis medico y obligatoriamente mester keda na Aruba, of cu su situacion ta cambia, y kico ta importante na e momento ey ta corda inscribi na Censo bek, y seguidamente inscribi na AZV tambe.

   “Pues esey ta hopi importante pasobra si no haci’e na tempo anto bo no tin ningun seguro y bo ta para responsable pa bo mesun gasto”, Solange Tchong a remarca.