Barco patruyero Friesland a yega Caribe bek pa yuda den operacionnan Anti-Droga

ORANJESTAD (AAN): Den fin di siman, Defensa Hulandes den Region Caribe tin un barco patruyero na su disposicion atrobe.

E barco di Marina, Zr.Ms. Friesland a yega Curacao banda di 12’or di merdia.  E barco aki Zr.Ms. Friesland lo permanece minimo 6 luna den Region Caribe.

    Durante e lunanan benidero e barco lo patruya intensivamente riba laman Caribe. Entre otro e lo keda desplega pa operacionnan anti-droga, ehecucion den caso di contrabanda di arma y traficacion di hende, pero tambe eventualmente ora di yudanza di emergencia durante un horcan paden of pafo di Reino. E barco lo nabega tambe pa Guardacosta di Caribe Hulandes, y tambe lo ocupa su mes cu mantenimento di reglanan di medioambiente,  por ehempel si tin di haber cu piscamento (ilegal).

    E barco patruyero nobo atrobe ta un (Oceangoing Patrol Vessel) barco patruyero apto pa Oceano di Clase Hulandes. Zr.Ms. Friesland den cuminzamento di aña 2018 tabata activo pa ultimo biaha como barco patruyero den Region Caribe. Cu presencia di e barco patruyero aki, Forsanan Arma ta cumpli cu su tareanan constitucional, tal manera mantenimento di orden huridico internacional.

   E barco patruyero anterior, esta , Zr.Ms. Groningen, a sabi di registra un captura record di droga, di cinco biaha den un luna, y a intercepta miles di kilo di droga.