ORANJESTAD (AAN): Banco Central di Aruba (BCA) ta orguyoso di anuncia lansamento di su di tres publicacion den e serie "Gobernando for di Futuro,"
e biaha aki titula "Liderando cu Equidad." Siguiendo e prome dos edicion cu a trata riesgonan y solucionnan inclusivo, e edicion nobo aki ta analisa bienestar di nos comunidad. E ta enfoca riba e "ken"— e individuonan, famianan, y comunidadnan cu nan bida diario ta worde impacta pa decisionnan di maneho. E publicacion nobo aki ta un coleccion di shete estudio cu ta investiga e fundamentonan di un sociedad stabil y husto: e abilidad pa gana un salario husto, por paga pa necesidadnan basico, biba saludabel y traha den un ambiente sigur.
"E serie aki ta un base fundamental di nos compromiso pa fomenta bienestar economico y contribui na un Aruba resiliente y inclusivo," asina Jane Semeleer, exPresidente di BCA, a bisa. "E retonan cu nos isla ta enfrenta ta compleho, pero poniendo e bienestar di tur Arubiano na centro di nos agenda di maneho, nos por sigura un futuro prospero pa tur. Nos intencion ta pa e investigacion aki ta un herment vital pa esnan cu ta traha maneho y un catalisador pa debate publico informa."
E edicion aki, "Liderando cu Equidad," ta duna un bista claro riba e retonan y oportunidadnan cu Aruba ta enfrenta awe, dividi den tres area clave:
(1) Realidad Economico y Equidad Social: E seccion aki ta trata e preguntanan tocante husticia financiero y oportunidad na Aruba. Studionan den e parti aki ta explora:
(*) Equidad di genero: Di con progreso den equidad di genero no a traduci su mes den pago igual of participacion mas halto di hende muhe den e forza laboral?
(*) Presion riba clase medio: Con inflacion, specialmente den transporte, ta afecta famianan di entrada medio di forma desproporciona?
(*) Empleo pa hubentud: Kico "siguridad laboral" berdadero ta encera pa hobennan Arubiano, bayendo mas leu cu djis tin un trabao, pa tin un carera sigur y cu nificacion?
(2) Siguridad Fundamental pa Desaroyo Digno: E parti aki ta examina e pilarnan esencial cu tur hende mester pa traha un bon bida. E investigacion ta cubri:
(*) Siguridad di cuminda: Con bon Aruba ta score riba acceso, disponibilidad y stabilidad di cuminda? E investigacion ta identifica tanto exito como areanan pa mehoracion.
(*) Conocemento financiero: E studiantenan na institucionnan di educacion superior publico na Aruba ta ekipa cu e conocemento y habilidadnan financiero cu nan mester pa traha un futuro sigur?
(3) Adaptando na un Planeta cu ta Cambia: E seccion final ta confronta e retonan climatico urgente cu ta impacta nos isla y nos hendenan directamente. E capitulonan aki ta investiga:
(*) Siguridad di energia: Mientras Aruba ta cambia pa energia berde, ki riesgonan nobo (geopolitico, digital, cadena di suministro) nos ta enfrenta y con nos por maneha nan?
(*) Calor extremo y trabao: Con aumento di temperatura y calor extremo ta afectando e salud y productividad di nos mercado laboral y kico nos por haci al respecto?
E publicacion completo, "Gobernando for di Futuro – Liderando cu Equidad," y tur e studionan den dje ta awor disponibel pa publico. Por download e publicacion for di e website di BCA na:
Banco Central di Aruba ta encurasha tur hende pa lesa y discuti e resultadonan y recomendacionnan importante aki.
