Baki den Bario a demostra cu tin necesidad pa maneho di desperdicio di manera pagabel

ORANJESTAD (AAN): Diasabra ya pa 6'or y mey di mainta, a forma un rey largo di pickup yena cu sushi riba e caminda entre Theresita Center y Caya Corsou.

Un gran cantidad di ciudadano di tur skina di San Nicolas a yega cu nan desperdicio cu tin algun tempo ta acumulando den cura di cas, pa motibo cu e prijsnan di baki grandi pa tira sushi afo a bira impagabel despues cu e cera  dump na Parkietenbos.

  Baki den Bario ta iniciativa cu a lanta despues cu Gobierno anterior abruptamente a cera e dump sin un plan alternativo, y a continua den e gobierno di AVP-Futuro pa alivia e situacion di sushedad acumula na cas.

   Despues di e prome Accion di Bario siman pasa na Noord, a mira realmente e necesidad pa tipo di iniciativanan asina. Tin un problema structural di acumulacion di desperdicio manera sofa, colchon, television, frigidaire y stoof bieu, cu ta keda acumula den cura di cas mirando cu pa gran mayoria, e servicio di tira sushi grandi afo ta impagabel. E cantidad di baki grandi di sushi cu a yena cu desperdicio den un caya manera Semeleerstraat ta duna indicacion di e embergadura di e problema aki.

   Pa tal motibo, diasabra mainta 7'or, Prome Minister di Aruba mr. Mike Eman, hunto cu Parlamentario Otami Thomasia y personal di Bureau City Inspector, Serlimar y Ecotech a coordina henter e proceso di deshaci di desperdicio domestico di manera eficiente. A percura pa separacion di sushi y den apenas dos ora, ya a hiba 18 baki grandi completamente yen pa nan respectivo destino pa procesamento.

   Gobierno ta analisando e posibel solucionnan pa di manera structura, duna comunidad e espacio pa deshaci di nan desperdicio di manera pagabel y sostenibel. Ta anticipa cu na final di e accion di Baki den Bario na San Nicolas pa 11'or y mey, alrededor di 500 pick up completamente yen lo a deshaci di nan sushedad.

   Prome Minister Eman ta haya sumamente importante pa tin contacto directo cu comunidad, no solamente durante periodo di campaña, pero tambe unabes ta den Gobierno. Asina so ta haya sa realmente kico ta biba den comunidad. Ademas esaki ta yuda mantene e gobernante cu su dos pianan riba vloer.