ORANJESTAD (AAN): Aña 2024 ta bayendo positivo y esaki ta duna Organo Ehecutivo AZV (OE AZV) e espacio financiero pa ehecuta varios proyecto.
Un di e proyectonan importante aki ta esun di dokter di cas. OE AZV ta percura pa fortifica e prome liña di cuido cu mas dokter di cas y praktijkondersteuners.
No ta un secreto cu mundialmente ta wak un escasez di expertonan medico, incluyendo di dokter di cas. Sinembargo, contrario na varios otro isla ruman manera Boneiro, Corsow, SABA y Sint Maarten, Aruba ta e unico isla den region cu ta dispone di su propio sistema di educacion (specialisacion) pa dokter di cas continuo cu resultado positivo.
Ta danki e.o. na e sistema di educacion aki cu Aruba na final di 2024 lo conta cu alrededor di 50 dokter di cas.
Inscripcion nobo of cambio
Organo Ehecutivo AZV ta satisfecho cu awor tin espacio pa brinda e aseguradonan mas opcion compara cu algun aña pasa.
Por ehempel ora ta registra pa prome biaha na AZV of ora e asegurado ta desea di haci cambio di dokter di cas. Awor tin e posibilidad ey paso a habri algun oficina di dokter di cas nobo. Por ehempel e HOED (Huisartsen Onder Een Dak) na ImSan y Piedra Plat. Pero tambe ta bay tin dokter di cas nobo manera dr. C. Kelly (entrante 1 di augustus 2024 na Noord 82A) y dr. M. Martis (entrante 1 di september 2024 na Noord 82A).
Terminacion cu dr R. Luchmun
Pero tin mas cambio ta bay tuma luga. E contracto entre OE AZV y dokter di cas R. Luchmun ta bay finalisa. Entrante 1 di augustus 2024 tur asegurado di AZV inscribi cerca dr. Luchmun lo traspasa automaticamente pa ImSan HOED, Pastoor Hendrikstraat 10, telefon 5248730.
Esaki ta nifica cu e asegurado no tin nodi haci nada, tur cos ta keda regla digitalmente y e cambio e asegurado ta wak -entrante 1 di augustus 2024- via e AZV app. OE AZV ta gradici dr. R. Luchmun pa tur servicio medico cu el a ofrece e aseguradonan di AZV incluyendo e colaboracion cu a duna pa prolongacion di contracto ora esaki tabata necesario. Tambe ta desea dr. R. Luchmun hopi exito den su siguiente reto y etapa di bida.
Terminacion cu dr Boderie
E ultimo dia di contracto entre OE AZV y dr E. Boderie ta 31 di augustus 2024. OE AZV ta gradici dokter di cas E. Boderie pa tur su añanan di servicio y dedicacion na e aseguradonan di AZV incluyendo e biahanan di prolongacion di contracto cu a logra realisa cu dr. E. Boderie tempo cu esaki tabata necesario.
Ta desea dr. E. Boderie tur clase di exito den su siguiente reto y etapa di bida. OE AZV ta haci uzo di e oportunidad pa informa tur asegurado inscribi cerca dr. E. Boderie cu entrante 1 di september 2024 un traspaso automatico ta tuma luga pa ImSan HOED, Pastoor Hendrikstraat 10, telefon 5248730. Esaki ta nifica cu e asegurado no tin nodi haci nada, tur cos ta keda regla digitalmente y e cambio e asegurado ta wak -entrante 1 di september 2024- via e AZV app.
