Awor tur cliente di WEB Aruba lo haci uso di ‘Account Number’

Lo no uza e famoso ‘Number di Percela’ mas

ORANJESTAD (AAN): E acostumbrado ‘Number di Percela’ di clientenan di WEB Aruba NV, ta cambia awor pa un ‘Account Number’ di 10 cifra.  Esaki ta un cambio completo pa tur cliente di WEB Aruba, tanto residencial y comercial. Esey ta e cambio mayor cu clientenan lo ripara di e sistema nobo di administracion di cliente, cual WEB Aruba a introduci dia 4 di November.

   Cu un acto simbolico, director di WEB Aruba den presencia di empleadonan di departamentonan envolvi a duna e señal oficial. Esaki a efectua despues di un trayecto largo di preparacion, testing, implementacion y training. Hunto cu e sistema nobo, e compania di awa a lansa e portal di WEB Care totalmente modernisa. E sistema nobo di administracion di cliente tabata necesario pa motibo cu e sistema bieu no tabata cumpli mas cu exigencianan contemporaneo.

   Bo Account Number: E cambio di mas grandi pa e clientenan cu un conexion di awa, ta cu e number di percela ta stop di existi y na su lugar ta bini e Account Number di 10 cifra. Pesey a introduci e sistema cu e lema ‘Nos ta bay pa un 10!’. Por reconoce e Account Number nobo na su 10 cifra y na e hecho cu e no tin strepi meymey manera tawatin den e number di percela.

   E Account Number ta importante ora di paga e cuenta di awa of pa comunica cu WEB. Cada Account Number ta mara na un conexion di awa y e ta sigura cu WEB su sistema nobo di administracion por procesa pago rapido y corectamente.

   Website nobo di WEB Care: Hunto cu e sistema nobo a lansa e portal nobo di WEB Care. E portal di WEB Care tabata existi caba y ta duna un bista cla di e cliente su consumo di awa y su historia di pago. E portal a keda completamente modernisa.

   Usuarionan di e portal existente di WEB Care mester registra di nobo, cu e mesun adres di e-mail. Usuarionan nobo tambe por registra, yamando Call Center di WEB pa inscribi nan adres di e-mail. Ta haya mas informacion riba website di webaruba.com

   Aunke empleadonan a train cu e sistema nobo, ainda e servicio lo por ta un tiki slow, ya cu nan tin cu custumbra cu e sistema. P’esey WEB ta gradici comunidad pa nan comprension y pasenshi. Gerencia di WEB ta felicita e grupo di proyecto y tur colega di ICT y sector di Distribucion di Awa & Customer Service. Un aprecio grandi pa nan esfuerzo y motivacion pa a siña con e sistema ta traha, pa duna input con e lo por traha cu data di WEB y finalmente train, train y train pa traha optimalmente cu e sistema.

   Sistema nobo di DiTra: Nan a splica cu e sistema nobo di administracion di cliente ta forma parti di proyecto DiTra (Digital Transformation). Cu e proyecto aki lo yega na un aplicacion den Cloud, centralisa y integra den un solo plataforma pa sostene procesonan primario y secundario di WEB su organisacion.

   E ta encera optimalisacion di sistemanan, pero tambe digitalisacion di trabounan cu tawata sosode manualmente. E proyecto lo optimalisa experiencia di cliente, alinea operacion (operacion y ICT) pa reduci gasto y provee informacion real-time, preciso y transaccional y reportahe pa on-going performance management.