Lema 2021: Igualdad --- ORANJESTAD (AAN) – Awe, Diabierna 10 di December 2021, ta wordo celebra e di 73 Aniversario di e Declaracion di Derechonan Humano cu a wordo aproba na 1948
y a wordo adopta y proclama door di e Asamblea General di Nacionnan Uni, dia 10 di December 1950 y, desde e fecha aki, ta wordo conmemora rond mundo.
Kico ta Derechonan Humano?
Derechonan Humano ta derechonan inkebrantable cu ta pertenece na tur hende, sin importa raza, sexo, nacionalidad, idioma, religion, origen etnico of cualkier otro condicion.
Organizacion di Nacionnan Uni a crea un lista di 30 derecho humano, unda ta defende e derecho na bida, libertad, educacion, trabao, etc., cu mester wordo respeta sin cu ta existi ningun sorto di discriminacion. Na prome lugar e Declaracion Universal di Derechonan Humano ta acentua cu “Tur ser humano ta nace liber y igual den dignidad y derechonan”.
LEMA 2021: Igualdad
Precisamente pa Aña 2021 e lema di e campaña di e Dia Internacional di Derechonan Humano ta IGUALDAD, haciendo referencia na e prome articulo di e Declaracion Universal. E idea di igualdad ta den linea cu e agenda 2030 y cu e enfoke di Organizacion di Nacionnan Uni di no laga ningun hende keda atras.
Igualdad, inclusion y no discriminacion ta e centro di e discurso di e aña aki, protehando e gruponan di mas vulnerable; mucha, hende muher, pueblonan indigena, personanan LGBTi, imigrante, personanan cu capacidadnan especial.
Y den mesun rosea aki e igualdad mester wordo aplica cumpliendo e siguiente mandato: “Reconstrui miho, mas husto y mas berde” cu e metanan siguiente: Basa e economia riba e derechonan humano pa kibra e ciclonan di pobreza. Sirbi di base pa un contrato social nobo, cu mas derecho social y cultural. Igualdad di oportunidadnan pa e hobennan. Caba cu e inhusticia encuanto distribucion di vacuna. Husticia climatico y derecho na un medio ambiente saludable.
Hendenan muher cu a haci posible e Declaracion Universal di e Derechonan Humano:
Hende muher, atravez di e historia, a desempeña un rol fundamental den tur loke ta concerni na e desaroyo y avancenan di humanidad. Un di nan ta su participacion den e creacion di e documento pa haci posible e Declaracion Universal di e Derechonan Humano.
Un di e hendenan muher aki tabata Eleanor Roosevelt, Prome dama di Merca, ken tabata Embahador y delegado y Presidente di e Comite di e Asamblea General di Nacionnan Uni. Otro dama importante tabata Hansa Mehta, di origen Hindu, luchador incansable di e derechonan di hende muher y mundialmente reconoci pa su frase: “Tur ser humano ta nace liber y igual”.
Otro hendenan muher cu a traha pa amplia e derechonan humano ta Begum Shaista Ikramullah, Lakshmi Menon, Minerva Bernadino, Evdpkia Uralova, Marie-Helene Lefaucheux, Boddil Begtrup.
Na 2018, cu e Declaracion a cumpli su di 70 aniversario, Eleonor Roosevelt a sostene un ehemplar di e Documento di e, Declaracion di e Derechonan Humano, den e FDR Presidential Library & Museum.
Riba potret, Eleanor Roosevelt.
