Awe Dialuna tin e prome 'Hackathon Robotics Challenge: ‘Sustainable In Motion’

LeAnn Tromp ta splica: Organiza pa The STEM Embassy:

ORANJESTAD (AAN) LeAnn Tromp, “Event Manager y Education Manager” di The STEM Embassy, den entrevista cu DIARIO a duna di conoce, cu STEM ta un organizacion cu ta consisti di studiantenan di Aruba y Curacao (Ciencia, Tecnologia, Ingenieria y Matematica), y nan tin e meta pa introduci y promove STEM na e hubentud di e Islanan ABC.

   “Nos ta un organizacion cu tin mas of menos tres aña aki na Aruba, y nos ta enfoca riba muchanan den edad di entre 12 pa 21 aña, pero e aña aki ta pa muchanan entre 12 pa 18 aña. Nos kier siña nan mas, duna nan e confianza special esnan cu kier bay studia afo, y cu tin biaha no tin e confianza ey pasobra nan ta pensa cu nan ta bay studia na Aruba”, LeAnn Tromp a indica.

   El a agrega cu e hobennan aki ta haya tayernan di trabao, nan ta conecta nan cu e hendenan den e veldnan. Na aña 2022 y 2023, nan a haci un Examen Kamp, yama “Ki ta bo stem”, cu a consisti di ocho ta tayer di trabao pa aña, cada bez cu 100 mucha.

   E aña aki nan ta organizando e prome “Hackathon Robotics Challenge “Sustainability In Motion”, cu ta tuma lugar awe, Dialuna 29 di April, te cu 1 di Mei, pa participantenan di 14 te 18 aña do edad. Mester ta studiantenan di scol secundario (EPB, MAVO, HAVO, VWO). Registracion tin un tarifa.

   “Na e prome dos dianan di e evento nos lo duna tayer di trabao di Transportacion Sostenible, Ingenieria Electrico,  Programacion di Computer, Ingenieria Mecanico”. Dia 1 di Mei e robotics challenge lo tuma lugar unda e participantenan mester diseña y  programa nan mesun robot pa resolve un problema di Aruba. The STEM Embassy ta spera cu hopi studiante di Aruba lo por haya e bunita oportunidad di participa na e tayernan di trabao y experiencia e mundo di Ingenieria y Tecnologia”, LeAnn Tromp a splica”.

   El a comenta cu STEM ta algo hopi grandi no na Hulanda so, pero na henter mundo. Por ripara cu mas y mas ta wordo automatiza, y por tene e palabra STEM hopi mas.

Hopi hende ta bisa cu e futuro ta STEM, aki un par di aña hopi cos ta bay ta den STEM. Na Aruba tambe tin estudio STEM na Universidad.

E studiantenan aki cu tin e tayernan di trabao menciona ta biba, studia y traha na Hulanda, y aya nan ta traha riba nan eventonan y ta bin Aruba pa comparti nan conocemento cu nos hobennan,  LeAnn a menciona.