Avionnan di Winair a bin busca refugio na Aruba

Tormenta Tropical Ernesto

ORANJESTAD (AAN): Riba Diamars henter dia, Aeropuerto Prinses Juliana di St. Maarten a keda cera, debi na pasada di Tormenta Tropical Ernesto den e area.  E lo por keda cera awe Diaranson tambe, pero tur esey ta depende con e situacion riba pistanan di aterizahe, y sistemanan di instrument landing system a keda, y tambe condicion di Terminal di Aeropuerto.  Si tur cos ta OK, e Aeropuerto di St. Maarten lo habri bek awemainta 7:00 am.

   Esey ta e motibo pakico gerencia di aerolinea Winair cu tin su sede na St. Maarten, a dicidi na laga 5 di nan avionnan commuter bula bin Aruba, y keda staciona na forma safe riba plataforma aki.

   Winair tin den servicio, dos avion ATR45-500 cu por carga 48 pasahero.  Tambe nan tin 4 avion De Havilland Twin-Otter cu por carga maximo 18 pasahero.