BOGOTA: Pa cinco aña largo, e tabata dedica su mes pa construi cierto tipo di Submarino pa asina yuda narcotraficantenan transporta droga for di Colombia pa sea paisnan na Centro America, of hasta trata na yega te na Merca.
Den fin di siman, autoridadnan Colombiano a logra detene Oscar Moreno Ricardo, kende ta conoci pa hopi como e “Rey di Submarino” narcotraficante, y e ta un di e personanan principalmente responsable di salida di cocaina via di e tipo di botonan aki, cruzando Oceano Pacifico.
Oscar Moreno ta conoci tambe como ‘Cachano’ y ‘El Viejo’, y el a wordo gara na Medellin, aunke su trabao ta na Acandi, cu ta un municipio na parti panort di Colombia.
El a wordo deteni durante un Razzia cu Ministerio Publico a prepara hunto cu Ehercito y Polis Colombiano, cu sosten di informacion di inteligencia di DEA di Merca. Pasobra tin un ordo di extradiccion for di Merca tambe contra Oscar Moreno, pa acusacionnan relaciona cu narcotrafico.
Segun e US District Court di Texas cu ta pidi pa su detencion, Oscar Moreno a cuminza cu su actividad pa narcotrafico na 2005 como piloto di Speedboat tipo Go-Fast, cu cual e tabatin contacto cu cartelnan Mexicano, manera e.o. Jalisco Nueva Generacion, y tambe gruponan arma na Colombia, cu ELN, y tambe Clan del Golfo. Asina el a asumi e logistica y a enfoca riba transporte maritimo di cocaina pa exterior.
Ultimo cinco añanan el a bin ta dedica na e construccion di Submarino semisubmergible, cu ta un metodo di transporte cu ta dificil pa detecta cu Marine-Radar, y cu a bin ta mehorando ultimo tempo. Y esaki a bira un di e principal metodo pa manda cocaina pa exterior.
Cu e tipo di Submarinonan aki, nan tabata transporta hasta cinco ton di cocaina pa paisnan na Centro America.
