ATIA a yuda motiva nos atletanan hoben durante e conferencia LIDERA

ORANJESTAD (AAN):  Como parti di e programa di e conferencia LIDERA, organisa pa Aruba T rade & Industry Association (ATIA),

rond di 450 atleta hoben di Aruba a atende diabierna ultimo un sesion di motivacion duna pa e orador internacional Trent Shelton.

            E evento a conta tambe cu figuranan destaca di deporte local, cu a comparti na experiencia y lesnan den ballroom di Marriott Aruba Resort & Stellaris Casino. Pa ATIA, esaki tabata un oportunidad excelente pa aporta na un desaroyo integral di e nos deportistanan, y hunto cu ne, di e futuro lidernan di nos comunidad.

            Den cooperacion cu diferente asociacion y ekipo di deporte local, ATIA a logra brinda un oportunidad cu sin duda e hobennan lo keda recorda. Ta di remarca cu un encuentro, di e magnitud aki y cu hobennan di entre 14 pa 20 aña, ta algo sin precedencia na e isla.

            Despues di a yama tur presente bon bini, director di ATIA, Herrick Henriquez a duna palabra na Minister di Deporte, Endy Croes kende a gradici e organisacion pa haci e evento posibel reconociendo cu actividad asina caminda ta stimula e hoben su pasion pa alcansa metanan, ta mes importante cu e entrenamento fisico.

            Shelton, kende su mes ta un ex-hungado profesional di futbol Mericano, a pone su mes disponibel y tabata masha entusiasma di por a papia cu e atletanan hoben. Durante mas di un ora, el a conta di e retonan cu e mes a afronta, kico ta loke a funciona p’e y principalmente a motiva nan pa nunca stop di persigui nan meta. Muchanan sinta den e sala a mustra hopi atento na e loke Shelton a trece dilanti y a haci preguntanan al caso.

            Den e panel cu tambe a hiba palabra durante e sesion, tabatin Devah Leenheer, Jordy Groters, Elliott Loonstra y Nicole Hoevertsz. Nan storianan personal di trabou duro y exito a yuda e muchanan relata na e esfuerzo cu ta necesario, pero tambe cu nan soño por bira realidad. Asistentenan tambe por a interactua cu Sarah Quita Offringa, Tarianna Doornkamp, Deaxo Croes y Chadwick Tromp.

            Sin duda algun tabata un atardi for di cual e muchanan a bay cu hermentnan cu lo ta masha util den deporte, pero tambe den aspecto profesional y personal. E impacto tabata notabel te hasta pa e mayornan cu posterior na e evento a expresa di a nota e entusiasmo cu e muchanan a keda cu ne. Pa cu esey a elogia ATIA su iniciativa y ta spera cu tipo di evento por ripiti.

            ATIA ta gradici Aruba Bank, Setar y Lotto pa Deporte pa haci e evento posibel. ATIA kier a yama un danki tambe na tur cu, di un manera of otro, a aporta; en particular na e organisacionnan deportivo di nos isla cu a atende e invitacion.