Calor na tera frieu ta intolerabel
ORANJESTAD (AAN) – Un Arubiano biba na Hulanda a comenta pa DIARIO locual el a experiencia Diamars cu e calor a lanta asina furioso na tera frieu (Hulanda), superando e temperatura ambiental di mas halto cu e pais a yega di experimenta te awo; e calor ta simplemente intolerable.
El a conta cu den mayoria di empresa a laga nan trahadornan keda of bay cas, mirando e efecto negativo cu e ola di calor aki ta genera pa salud di e ciudadanonan. El a expresa cu e ta sinti hopi falta di e brisa di Aruba. Na Hulanda no tin ni un tiki biento, el a comenta.
Autoridadnan meteorologico di Europa ta calcula cu e temperaturanan halto asina lo por bati record na Europa, e siguiente simannan.
Varios pais di Europa Occidental manera, entre nan Francia, Spaña, y Portugal, ta sigui den e lucha contra candelanan forestal, devastador, desencadena pa e ola di calor aki.
Cientificonan ta indica cu ta existi un relacion directo entre e olanan di calor aki y e cambio climatico, ya cu e emisionnan di gas, di efecto invernadero, ta aumenta su intensidad, duracion y frecuencia. Na Europa a registra cantidad di morto door di e calor mes y tambe door di e candelanan forestal, vooral den e regionnan den e interior di e centro y noord di e paisnan.
Den e region di Caribe tambe e calor ta sofocante. Aki na Aruba hopi hende ta keha di dolor di cabes, tipo migraine, cu no ta calma cu pildo. E peaton ta bira hopi cansa y canamento ta bira un caminda di Cruz pe, hasta den distancianan cortico.
No obstante cu tin brisa na Aruba, e calor ta hopi intenso, y un bez mas redaccion ta haya comentario di usadornan di transporte publico, specificamente di Arubus, cu ningun autoridad ta tene cuenta cu e clima y no a pone sikiera un pida afdak den e terminal di Playa, pa proteha nan un tiki tanten nan ta warda bus.
