Mediador Anselmo Pontilius:
ORANJESTAD (AAN) Mediador Anselmo Pontilius, ken a realiza un trayectoria largo como Lider Sindical, y sigur varios aña Presidente di e Federacion di Trahadornan Arubano (FTA), den entrevista cu Matutino DIARIO a referi na e mundo e desaroyonan na Aruba, previamente y durante e ultimo cuater decadanan di Status Aparte di nos pais.
“Ami ta kere cu Aruba su mes ta cuater decada den cual e pais a dicidi di atende, administra y dicidi su mesun asuntonan, contrario ora nos tabata den Antiyas, unda bo tabata tin un Gobierno Central, y dia 1 di Januari 1986, ya nos a haya nos propio Parlamento, envez di un Eilandsraad, y nos propio Conseho di Ministro, y asina ey nos Banco Central, nos mesun moneda, y cantidad di servicio y institucionnan cu a wordo poni riba nan mes”, Pontilius a relata.
El a sigui conta, cu net prome cu 1985 riba caminda pa yega Januari’86, Aruba a conoce un cantidad di impacto socio-economico serio.
“Por ehemplo, e devaluacion di e Bolivar, a afecta nos turismo severamente y comercio, ya na 1983 caba. Na 1984, e informacion cu a drenta mas pisa, tabata dos: ceramento di Caribbean Hotel, pero esun di mas pisa tabata na October’84 cu a informa cu definitivamente e Refineria a cera. Na 1085 e refineria cera completamente, cu impacto enorme riba nos economia. Mas cu 40% di e economia a wordo afecta severamente, y bo a haya cu hopi hende a abandona Aruba. Hopi serio e tabata y ora bo Wak bek awe, na aña 86, y si bo bay cerca nos amigonan na Censo, nan lo bisa bo cu e poblacion lo tabata probablemente entre 60 mi pa 62 mil hende, y awe, por lo menos cifranan cu nos a caba di wak publica, nos ta riba un 110 mil habitante cu ta biba akinan. E por ta mas, of menos, pero di e banda ey cu a dobla e cantidad di habitantenan”, Anselmo Pontilius a relata. Den mas articulo lo elabora mas tocante e interesante relato aki di Aruba su Status Aparte.
