Aruba presente na Conferencia Mundial SWSD Panamá 2024

ORANJESTAD (AAN): Dia 4-7 di april 2024 a tuma lugar e conferencia conhunto mundial di "Social Work, Education and Social Development" (SWSD) na Panamá,

caminda diferente pais a bin hunto pa haci nan presentacion pa mundo sa tocante diferente topico den e tema: Respetando diversidad atraves di accion conhunto Social.

Dia 6 di april 2024 un bandera chikito di Aruba a ser lanta solitariamente mei mei di hopi otronan. Como unico Arubiano Faviënne Thodé a representa Aruba, trahadornan social, y muchanan di Aruba dignamente na Panamá cu e onderzoek "The Aggregated Cost of Social Services in Child Protection in Aruba".

Faviënne Thodé a gradua aña pasa na Universidad di Aruba cu e onderzoek aki y un docente a recomenda pa aplica pa present'e na e conferencia mundial di SWSD 2024.

Faviënne a haya e grato noticia cu e comision mundial di SWSD a aproba su onderzoek pa motibo cu e ta provee un base pa defende y apoya e aumentamento di budget pa servicionan di proteccion di mucha. Alaves nan a haya cu e onderzoek ta uno util pa otro paisnan copia of replica.

Participantenan di diferente pais a mustra interes den y anticipacion pa e publicacion di e onderzoek pa por uz'e na nan pais.

Un grupo grandi di casi 20 participante di Curaçao tabata presente na e conferencia y a bin inmediatamente pa duna Faviënne sosten ora nan a tende cu nan hermana isla Aruba lo haci un presentacion.

Faviënne a aprecia e apoyo di e grupo di Curaçao masha hopi mes y ta gradici e grupo di Curaçao Social Workers. Otro aña e conferencia lo tuma lugar na Chile.

Faviënne ta hopi contento cu e luna di april ta dedica na e conscientisacion di abuso di mucha y cu e por a presenta Aruba dignamente cu su onderzoek pa nos muchanan.

E ta duna danki na prome lugar na Dios todopoderoso cu a gui'e y dun'e sabiduria y inteligencia. Danki na su mayornan, rumannan y demas famia cu a sosten'e financieramente pa haci tur esaki un realidad. Danki na Universidad di Aruba, specialmente Clementia Eugene cu a kere den Faviënne y su onderzoek. Tambe Faviënne ta gradici tur esnan cu di un manera of otro a apoy'e.

Faviënne su mensaje pa Aruba ta:

"Laga nos keda proteha nos muchanan for di abuso, haci bo mes consciente di accionnan cu abo por tuma pa preveni of interveni. Si nos zorg pa e bienestar di nos muchanan, nos por conta riba un mihor futuro pa nos Aruba."

Pabien y danki na tur instancia y trahador social cu ta traha duro no solamente den april pero dia den y dia 'fo protehando nos muchanan.