Aruba pa prome biaha ta bay haya viviendanan den forma di high-rise

ORANJESTAD (AAN): Riba Diabierna atardi den Frankrijkstraat na Eagle, un actividad special a ser prepara pa Gobierno hunto cu

Departamento di DIP, DOW, y Palm Aruba Group na inicio di proyecto di vivienda mas nobo y inovativo riba e isla, cu yama “Caribbean Town Villas & Apartments”.

   Caribbean Town Villas & Apartments ta wordo desaroya pa e comerciante local Victor Acosta y su partnernan.

   Esaki lo bay bira e prome proyecto gated-community vertical y sostenible, un comunidad residencial informativo y exclusivamente pa comunidad local.  Caribbean Town Villas & Apartments ta e prome “living project’ mas nobo y moderno cu lo consisti di 330 vivienda.  Caribbean Town Villas & Apartments ta un gateway pa esnan den comunidad cu ta aspira di ta doño di nan propio cas.

   E casnan aki lo ta paden di full un muraya rond (gated community) di edificionan cu lo ta un concepto completamente ‘green’ y usa recurso renobable y convencional.  Asina ta garantiza cu ta integra cultura y tradicionnan hunto cu necesidad y principio di sostenibilidad.

   Caribbean Town Villas & Apartments lo consisti di cuatro edificio di 7 piso, cuatro townhouse edificio di 2 piso, 10 townhouse units pa cada edificio, y 16 bi-family one level buildings, pues 32 single homes.  Caribbean Town Villas & Apartments lo conta tambe cu commercial strip building, swimming pool, area pa practica deporte bao dak, dog park, y u noutdoor fitness station.

   Prome Ministro Evelyn Wever-Croes a gradici e desaroyadornan cu a kere den Aruba den bon tempo y menos bon tempo.  Pasobra a mira hopi a perde speranza den Aruba durante e pandemia.  Pero aki mira cu tin grupo cu a keda persisti hasta den momento di crisis.

   Segun Wever-Croes, e vision di Gobierno ta pa yuda tur ciudadano yega na nan propio cas.  Aworaki tin 8 mil persona wardando un tereno cu a pidi di Gobierno.  Pero mester ta realistico cu no tin 8.000 tereno disponible na Aruba pa e personanan aki.  Esey a pone cu Gobierno a bay busca pa traha hunto cu sector priva pa mira con por yuda e hendenan aki y soluciona e problema.

   Ta trahando keto bay riba terenonan cu ta bin disponible, pero no tin hopi mas.  Pesey mes ora cu Gobierno a haya chens pa traha cu e desaroyadornan aki riba e proyecto di Caribbean Town Villas & Apartments, e tabata parti di e solucion cu ta buscando pa asina por yuda cada famia riba e isla yega na su propio cas.

    E ta un proyecto unico den varios sentido, unda ta introduci na Aruba pa prome biaha vivienda den forma di high-rise.  E ta e prome proyecto multi familiar, y tambe e prome di 330 vivienda cu ta tene cuenta cu sostenibilidad na e escala aki dirigi riba comunidad local.