Aruba Open Beach Tennis 2022 a cuminza cu mas di 1.200 atleta di 40 pais participando

Evento grandi na beach di Bushiri

ORANJESTAD (AAN): Tur cos ta cla pa Aruba experiencia un biaha mas evento internacional riba beach, cu ta bira e ‘Aruba Open Beach Tennis Championship 2022’, localmente organiza pa BTA, esta Beach Tennis Aruba.

   E organizador Sjoerd de Vries durante un conferencia di prensa na e sede di e evento riba beach di Bushiri, a indica cu e ta hopi contento cu porfin desde cu Pandemia di Covid-19 a bati na porta, cu Aruba ta organizando e campeonato aki bek, y cu un biaha mas numeroso atleta internacional ta rumbo pa e isla.

   El a bisa cu despues di 3 aña e evento grandi aki ta bek, y segun de Vries, e sede di Aruba ya a bira conoci como e ‘Wimbledon di Beach Tennis’.

   “Nos ta e evento di mas importante di Beach Tennis, y tur e participantenan ta bin Aruba pa hunga beach tennis aki,” Sjoerd de Vries a splica.

   El a mustra cu en total, 1.200 atleta ta bin Aruba procedente di 40 diferente pais, y e organizadornan ta hopi entusiasma cu esaki.  Pesey mes, De Vries ta haya cu ta importante cu varios Departamento di Gobierno a ripara con importante esaki ta, y pesey nan ta desea pa gradici e.o. DOW, tambe DIP, Ministerio di Deporte, y tur a traha hunto pa haci Bushiri bira bek como debe ser.

   Na opinion di Sjoerd de Vries, e beach di Bushiri a keda bunita y awor e no ta djis ideal pa Beach Tennis so, sino pa hopi otro evento mas.

   E evento aki a cuminza Diadomingo 13 di November caba, y ta finaliza te Diadomingo 20 di November.  Lo no cobra entrada, pues e ta gratis.  Un chens unico pa pueblo trece nan yiunan, pa asina nan mira atletanan di nivel mundial competi cu e Beach Tennis aki.

   Lo tin entretenimento henter dia cu DJ, live music, y mucho mas.

   E atletanan ta competi na Aruba pa busca forma pa gana e mas di 60.000 Dollar na premio.  Y cada anochi lo bo por bay mira competencianan fuerte di e mihornan riba santo blanco.