ORANJESTAD (AAN): Na Aruba pa algun siman caba a haya sa cu tin e variantenan di India y di Brazil.
Relaciona cu esaki, Prome Minister Evelyn Wever-Croes a indica cu Aruba no ta bay cera e fronteranan pasobra tin variantenan.
E mandatario a splica cu ta pone den balans entre e interesnan, economia, turismo como tambe salud y bida di hende.
Manera cu e variantenan di India of di Brazil ta aworaki berdad ta algo di preocupacion, pero "no por bay dal Aruba cera pasobra e variantenan tey y nos no ta bay cerca pa otro paisnan cu tin e variantenan ey tampoco pasobra nos ta depende di turismo y nos mester cuminsa recupera nos pais", Wever-Croes a enfatisa.
Si na Aruba ta aplica e reglanan y e armanan pa proteha contra e virus y e variantenan, e ora "nos mester ta ok. Kico e armanan ta? Lamas man mas frecuente cu ta posibel, uza hand sanitizer ora bo no por, bisti tapaboca constantemente (...) tene distancia di hende y si bo tin un sintoma so keda paden, yama bo docter pa bo bay haci test", Minister Presidente a remarca.
Esey ta e armanan cu mester aplica contra e virus y ta e mesun armanan cu mester aplica contra di e variantenan di India of e variantenan di Brazil.
Si e situacion sali for di man mas cu claro mester tuma medidanan mas drastico, pero pa aworaki no ta mustra cu esey ta bay ta bay tuma lugar, e mandatario a finalisa bisando relaciona cu un pregunta durante su programa Live cu Tanchi Eve.
