Hose Figaroa:
ORANJESTAD (AAN): “Bo no tin cu warda necesariamente riba un Convencion di International Labor Organization (ILO) pa bo tuma paso”.
Esaki segun presidente di FTA Hose Figaroa kende a splica cu Union Europeo ya caba tin nan ‘guidelines’ cu a wordo traha caba riba trabaonan cu ta wordo dirigi digitalmente.
Figaroa a splica cu paisnan manera Mexico, Chile y Argentina cu tambe a pas legislacion local caba pa regula esaki.
“No ta necesario pa warda te ora cu ILO saca un guideline pa bo wordo obliga na tuma e pasonan aki, pero di experiencia nos sa si cu aki na Aruba registracion ta tarda”.
Nos tin convencionnan fundamental di ILO cu Aruba te dia di awa no a aproba y ratifica, segun e presidente di FTA.
El a sigui bisa cu no mester warda riba ILO pa tuma e tipo di pasonan aki, pues nos por cuminsa caba for di aworaki pa regula e tipo di trabaonan aki.
Segun Figaroa, aki na Aruba te na e momentonan aki e no a sosode hopi pero tecnologia ta avanzando quizas hopi mas lihe cu nos mes ta kere.
“Si ami bay online y mi ofrece por ehempel un trabao di diseña algo, eynan tambe ta trabaonan a base di plataforma”.
Por ehempel e plataforma Fiverr ta uno riba cual yen di hende ta haci trabaonan individual y Fiverr ta asigna na nan e trabaonan via nan plataforma, segun Figaroa.
El a sigui bisa cu e tipo di cosnan ey porta ta hopi mas cerca pa nos cu nos ta kere y e hecho cu esaki no ta tuma lugar hopi na Aruba, no ta pone cu na Aruba nos no tin cu cuminsa pensa pa regula e tipo di relacionnan aki.
https://diario.aw/fr/categories/noticia/general/aruba-mester-cuminsa-pensa-caba-riba-regulacion-di-trabaonan-digital#sigProIdca2ab0a4aa