ORANJESTAD (AAN): E organizacion di ‘Old Skool Bikers Aruba’ ta un sponsor grandi di Aruba Lions Club pasobra door
di nan colaboracion e club a haya fondo pa por sigui cu e trabaonan pa e comunidad di Aruba. Ya a usa parti di e fondo y a haci un donacion di 10.000 Florin na 8 organizacion aki na Aruba.
Pa otro aña cu ayudo di Aruba su comunidad, Aruba Lions Club lo hisa e suma di donacion mas ainda pa di e manera ey yuda mas organizacion cu ta traha na bienestar di e comunidad di Aruba.
Ta durante e ceremonia di instalacion di e directiva nobo di Aruba Lions Club a yama e presidente di Old Skool Bikers Aruba, Sr. John Tromp pa dilanti pa e ricibi den nomber di miembronan di Aruba Lions Club un plakaat di aprecio y gradicimento pa nan donacion haci na e club en cuestion. Aruba Lions Club ta un club di servicio cu den 2027 lo cumpli 80 aña trahando pa e comunidad di Aruba y ta bao di auspicio di Lions Club Internacional cu ta consisti di mas cu 46 mil club den mas di 200 pais y ta conta cu mas di 1.4 miyon miembro rond mundo y cu a cumpli 109 aña di existencia cu ta hacie e organizacion di servicio mas bieu y mas grandi mundialmente.
Por ultimo Aruba Lions Club ta compromote su mes pa sigui traha hunto cu su partnernan pa yuda mehora e calidad di bida di e pueblo pa medio di su diferente programa di servicio manera esun di Hospital Bed y Wheel Chair, Smile Mobile, Feria di Salud, bek to School Food Bags. Ta pidi pa pueblo keda pendiente pa Aruba Lions Club su siguiente actividad.
