Aruba Excellence Foundation a firma M.o.U. cu Instituto Pedagogico Arubano

ORANJESTAD (AAN): Durante un conferencia diaranson mainta,  a firma un  M.o.U. entre Aruba Excellence Foundation y Instituto Pedagogico Arubano (IPA) pa asina habri porta pa futuro colaboracion y proyectonan hunto.

             Varios luna atras Aruba Excellence Foundation (A.E.F.) a acerca Instituto Pedagogico Arubano (I.P.A.) pa analisa e posibilidad di brinda training na e team di A.E.F. pa capacita nan cu tools pa duna les na mucha. A sinta na mesa pa explora diferente opcion y asina hopi idea tremendo a bin dilanti, cual a contribui na e deseo di traha hunto pa desaroya Programa di Certificacion A.C.P. pa scolnan basico.

            E meta principal di fundacion A.E.F. ta pa ehecuta y sigui desaroya e programa di certificacion A.C.P. Como tal, e programa ta dirigi inicialmente na e sector di hospitalidad y servicio pa educa y duna informacion corecto y conciso tocante Aruba su caracteristicanan y enfoca ariba servicio excelente cu zjeito.

            Di e forma aki, A.E.F. ta cumpli cu su mision pa sostene e asina yama ‘Aruba brand identity’. Esaki lo promove e sentimento di orguyo di nos comunidad como tambe influencia positivamente e experencia di ‘One Happy Island’ di nos bishitantenan.

            Pa hopi aña caba tin e deseo y necesidad pa stimula e ‘Aruba brand identity’ na un edad mas hoben posibel pa asina nos tin hobennan embahador di Aruba su zjeito. Pa logra esaki, fundacion A.E.F. a sondea partnernan den sector di educacion pa realisa colaboracionnan efectivo y duradero. Un partnership cu I.P.A. ta nifica cu ta colabora cu un partner cu tin e experencia y experticio den cas pa loke ta trata formacion di maestronan y profesionalisacion den educacion. No solamente pa e maestronan na e diferente skol rond Aruba, pero tambe di nos trainers profesional di Aruba Excellence Foundation.

            Hunto lo haci tur esfuerso pa tur maestro na scolnan basico den prome instante, wordo entrena door di e profesionalnan di I.P.A ariba aplicacionnan didactico pa por incorpora e material di e programa di certificacion A.C.P. den e curiculo actual. E siguiente paso ta pa entrena maestronan di skolnan preparatorio y despues docente di scolnan secundario. Naturalmente teniendo na cuenta e conexion cu e metanan nucleo nacional di Educacion. E profesionalnan di A.E.F. lo percura pa comparti e contenido di e material di A.C.P. cu e maestronan, incluyendo ideanan pa haci esaki di un manera mas creativo y interactivo posibel. A.E.F. finalmente lo percura pa monitorea cu e informacion cu ta wordo comparti ta corecto y conciso.  

            E convenio aki lo beneficia ambos partido caminda cu tur dos lo brinda experticio den areanan cu tin mester di sosten y cu tin espacio pa crece y crea contenido cu informacion actualisa pa loke ta trata caracteristicanan di Aruba.

            Diaranson, Esther Broeksema di AEF, Marilyn Richardson di IPA y Marisol Croes, directora di profesionalisacion, a firma e M.o.U. pa asina habri porta pa futuro colaboracion y proyectonan hunto.

            Aruba Excellence Foundation a wordo institui door di Aruba Tourism Authority na juni 2018 y ta e fundacion encarga pa entre otro ehecuta e Aruba Certification Program (A.C.P.) como tambe e programa di Happy Information Officers (H.I.O.). Meta principal di e fundacion ta pa sigui desaroya y implementa A.C.P. y H.I.O. como tambe otro programanan specialmente diseña pa certifica personanan cu ta traha den sector di servicio y hospitalidad, p’asina percura cu e nivel di servicio excelente di Aruba ya bon conoci, por keda riba un nivel halto.