Aruba Conservation Foundation a participa den Opendag di Mariniers tambe

Educacion y concientizacion ta importante

ORANJESTAD (AAN): Recientemente Aruba Conservation Foundation (ex-Fundacion Parke Nacional) tabata tin e oportunidad di participa den Marinierskazerne su Open Dag annual pa comparti mas tocante nan mes.

   Ademas di papia di Aruba Conservation Foundation (ACF) y su metanan, lo mas importante ainda, tabata pa elabora riba e trabao di conservacion cu nos team ta eherce tur dia pa naturalesa di Aruba. Di e reintroducion di e 'Lora', pa restauracion di coral y mangel, y tambe e programa di Mehoracion di Biodiversidad di Flora, bishitantenan na e stacion di ACF tabata sorprendi y contento pa sa e trabao cu ta ser haci pa conserva naturalesa di Aruba.

   Nos ta keda comprometi na sigui crea mas concientisacion y duna educacion na e comunidad di Aruba, especialmente muchanan di scol. Un Danki na tur persona cu a tuma e tempo pa combersa cu nos team riba e dia aki.

   Y un danki grandi na e rangers di ACF cu riba Dia di Labor a dedica nan tempo pa comparti e gozo pero tambe e dificultdadnan cu nos sa enfrenta ora di conserva naturalesa.