Aruba celebrando e di 58 cumpleaño di Rey Willem Alexander

ORANJESTAD (AAN): Awor na 2025, Rey Willem Alexander ta celebra su di 58 aña. Prins Willem Alexander dia 30 di April 2013 a huramenta como Rey Willem Alexander y

e siguiente aña nos a cuminza celebra dia di Rey enbes di dia di Reina. Dia di Rey, antes dia di Prinses y Aña di La Reina, ta un dia di fiesta nacional den e Reino Hulandes na honor di e hefe di estado.

   For di 1949 te cu 2013 nos tabata celebra Aña di La Reina dia 30 di April. Esaki ta e fecha di cumpleaños di Reina Juliana. Ora cu el a retira Reina Beatrix a scoge pa no cambia e fecha pa 31 di Januari cu ta su fecha di nacimento pero a lage dia 30 di April.  For di aña 2014 dia di Rey ta worde celebra dia 27 di April, e fecha di cumpleaños di Rey Willem Alexander.  Na tur partinan di Reino esaki ta conta pa tur trahador como un dia liber y ta worde celebra cu diferente actividadnan.

  Aña 2013 tabata e ultimo aña cu e celebracion aki a tuma lugar dia 30 di April y tabata conoci como Aña di La Reina. For di 2014 e dia aki yama Dia di Rey y ta worde celebra dia 27 di April, cu ta cumpleaños di Rey Willem Alexander.

  E dia aki ta worde celebra tur aña dia 27 di April, solamente ora cu esaki cay ariba un Diadomingo, e celebracion di Dia di Rey lo ta un dia prome, manera a pasa caba na 2016.  Awor na 2025 e lo socede un biaha mas, cu su fecha ta cay riba un Diadomingo.

    Prins van Oranje: Prinses Beatrix, e tempo ey prinses heredero, dia 25 di April 1967 a worde hospitaliza den Academisch Ziekenhuis Utrecht. Dos dia despues  dia 27 di April  Willem Alexander a nace. Na 5 lugar den reino manera tradicion el a worde saluda cu 101 balanan di saludo. For di su nacemento e tabata e di dos den linea pa e heredero di trono.   Su tata a duna dia 2 di Mei e acto di nacemento na e Stadhuis di Utrecht.

   "Nos ta yame Alexander", prins Claus a bisa. Su nomber completo ta Willem-Alexander Claus George Ferdinand.

   Ora cu Beatrix na 1980 a bira Reina, su yiu mayor automaticamente a haya e titulo di Prins van Oranje. Ora cu e prins a yega e edad di 18 aña, el a worde acepta den e Raad van State. Durante su temporada como studiante el a haya e apodo "Prins Pils", pa su entusiasmo cu e tabata tin pa studiamento.

   Despues di a haya su bul e preparacionnan a cuminda pa bira Rey.  Tambe el a cuminza presenta su mes mas den publicidad. E tabata bay eventonan oficial y tabata haci bishitanan oficial na provincianan y instancianan.

    Su infancia e Prins a pase ariba e Kasteel Drakensteyn den e comunidad  Lage Vuursche. Prins Willem Alexander  tin dos ruman homber: Prins Johan Friso (1968) y Prins Constantijn (1969).

  Prins Willem Alexander a sigui su estudio basico na e school Nieuwe Baarnse na Baarn. E Prins a cuminza su school secundario na Baarns Lyceum.

  Dia 30 di April 1980 e investidura a tuma lugar di Beatrix como Koningin der Nederlanden. Como consecuencia di esaki Prins Willem Alexander como yiu mayor a bira e prome heredero di trono y cu esey el a obtene e titulo di Prins van Oranje, un titulo cu desde 1815 a keda reserva pa e yiu mayor di e Rey.

   Famia Real a muda na 1981 di Kasteel Drakensteyn pa e paleis Huis ten Bosch na Den Haag. E Prins a sigui su estudio escolar na e prome  Lyceam Liberal Cristian na Den Haag. El a cera su estudio secundario na Atlantic College na Llantwit Mayor na Wales (Gran Bretania), na unda na aña 1985 el a haya su diploma di "International Baccalaureaat".

  Prins Willem Alexander a cumpli cu su servicio military prome cu el a inscribi su mes na aña 1987 na e Facultad "der Letteren" pa su estudio di historia na e Universidad Estatal di Leiden. E Prins a ocupa durante su estudio un edificio na e Rapenburg di e ciudad aki. E estudio di e Prins tabata inclui vaknan manera historia  universal y patriotico, historia economico,  politica y derecho publico, derecho di e comunidad Europeo, derecho internacional publico, derecho humano y economia.

  E Prins a termina su estudio cu un scriptie ariba e reaccion Hulandes ariba e e acuerdo di Francia (bao President De Gaulle) pa drenta den e reintegracion di e structura di commando di NATO. Na 1993 e Prins a slaag pa su examen di doctoraal geschiedenis.

  Na 1995 Prins van Oranje a bay biba den e edificio di Noordeinde 66 na Den Haag, cu ta keda pega cfu  Paleis Noordeinde.

  Dia 2 di Februari 2002 Prins van Oranje a casa cu Maxima Zorreguieta. E casamento a tuma lugar na Amsterdam.

   Cas Real: Despues di su  programa amplio di introducion militar e Prins a orienta su mes ariba e tereno amplio di  derecho di mantenimiento. El a profundiza su mes  continuamente den e sistema di gobierno y e funcionamento di administracion publico y otro administracionnan door di haci bishitanan  na e ministerionan di Hoge Colleges di Estado. E Prins den e cuadro aki a haci tambe bishitanan di esudio na institucionnan Europeo. E Prins a termina su periodo cu un programa di orientacion na e  industria di comercio.

  Prins van Oranje ta representa e Cas Real na ocasionnan oficial den tur sectornan di sociedad. Regularmente e Prins ta representa La Reina na ocasionnan internacional of e ta compañ'e na cubri su bishitanan di bishitanan di estado, manera esun na 2001 na Rusia.

Banda di su obligacionnan oficial Prins Willem Alexander ta haci hopi bishitanan di trabao na Hulanda, na unda e ta orienta su mes ampliamente ariba e cuestionnan social. Tambe e ta haci bishitanan regularmente na Antiyas Hulandes y Aruba. Su ambicion personal ta pa dos sector: e maneho di awa y deporte.

  Hura como Rey: Prins Willem Alexander dia 30 di April 2013 a huramenta como Rey Willem Alexander den e capital De Nieuwe kerk. Despues cu Reina Beatrix a firma e acta di abdicacion y cu lo keda como Prinses, Rey Willem Alexander hunto cu su casa Reina Maxima a duna un saludo na e balcon di e paleis na De Dam.

   For di e dia ey tur actividadnan en conexion cu Aña di la Reina a worde pasa pa 27 di April ya cu for di 2014 esaki ta e dia nobo cu lo celebra Dia di Rey.

                En conexion cu e Dia di Rey tambe a bin cu un tradicion bieu Hulandes cu ta weganan di Rey cu tambe a worde programa pa Aruba.

    Un feliz dia di Rey na tur lector.