Aruba Bank a duna charla educativo tocante pagonan digital pa alumnonan Colegio San Antonio

ORANJESTAD (AAN): Aruba Bank a participa den un charla educativo pa alumnonan di 4de klas di Colegio San Antonio MAVO na Santa Cruz. 

Esaki tabata pa conscientisa alumnonan tocante pagonan digital y e tecnologia di financiero moderno.

   E charla a wordo presenta for di punto di bista di un entrepreneur, pa motiva y inspira e generacion di hobennan tocante e rol di innovacion den e mundo di negoshi.

   Durante e sesion, e alumnonan a ricibi un introduccion simpel y practico di con pagonan digital ta funciona, con nan ta wordo uza den bida diario y con un entrepreneur ta saca probecho di e solucionnan digital aki pa maneha nan negoshi mas eficiente. Aruba Bank, como un partner financiero local, a comparti su conocimiento y experiencia riba e evolucion di pagonan electronico y e importancia di educacion financiero desde un edad hoben.

   E iniciativa aki ta forma parti di un esfuerso mas amplio pa conecta educacion, entrepreneurship y e sector financiero, cu e meta di prepara e generacion hoben aki pa un futuro cada biaha mas digital. Aruba Bank ta keda comprometi na contribui na desaroyo di e comunidad y educacion financiero na Aruba.