Aruba Airport Authority N.V. a obtene certificacion Environmental Assessment di IATA

ORANJESTAD (AAN): Aruba Airport Authority N.V. (AAA) ta orguyoso di anuncia cu Aeropuerto Internacional Reina Beatrix (Aeropuerto di Aruba)

a logra obtene e Environmental Assessment Certification (IEnvA) di International Air Transport Association (IATA), marcando un logro significativo den e compromiso di aeropuerto p’un crecemento sostenibel y proteccion di medio ambiente.

   AAA a pasa door di un proceso riguroso di capacitacion, evaluacion y verificacion pa mas cu dos aña pa por logra obtene e certificacion prestigioso aki.

   “Na aña 2025, AAA a desaroya y implementa su Environmental Management System (EMS), un sistema structura pa continuamente mehora e desaroyo ambiental di aeropuerto. Door di obtene e certificacion aki, Aeropuerto AUA a cumpli cu e standardnan riguroso estableci door di IEnvA y a demostra e determinacion pa minimalisa e impacto riba medio ambiente. E logro aki ta resultado di e trabao y dedicacion di e team di sostenibilidad di AAA, cu sosten di coleganan di henter e compania, como tambe nos socionan comercial y demas stakeholders clave”, asina Angeline Flemming, Director of Health and Sustainability na AAA, a expresa.

   Awo Aeropuerto AUA ta uni su mes na un grupo selecta di organizacionnan cu ta completamente registra y certifica pa IATA, reconociendo no unicamente e esfuersonan continuo, sino cu tambe ta fungi como inspiracion pa e demas companianan den e sector di aviacion haci mescos. AAA ta spera di por sigui innova y lidera como un ehempel den responsabilidad ambiental.