Artistanan di Caribe Hulandes a briya den actividad na Den Haag

ORANJESTAD (AAN): Arte di Caribe Hulandes a briya na Filmhuis Den Haag durante presentacion di e ganadornan

di e premio pa artista di e programa di investigacion di “Where Culture Lives” financia pa Ministerio di educacion, cultura y ciencia Hulandes (OCW)

   Diamars 23 di juni 2026, Filmhuis Den Haag a sirbi como escenario pa un showcase special di e ganadonan di e Artist Prize den marco di e proyecto “Where Culture Lives”, un iniciativa financia pa Ministerio di Enseñansa, Cultura y Ciencia (OCW) di Hulanda y ehecuta pa Lemonade BV di Sint Maarten.

   E evento a reuni artista sobresaliente for di e seis islanan ruman den Caribe Hulandes, cu a haya e oportunidad pa presenta nan talento, creatividad y expresion cultural na un publico internacional. Entre e artista invita tabata representante di Aruba, Ariadne Wever, kende a comparti su obra e serie di documentario cortico ‘Legado di famia’ inspira pa identidad, historia y bida diario di comunidad di Aruba.

   E proyecto ‘Where Culture Lives’ tin como meta pa documenta, mapea y fortalece e rikesa cultural cu ta biba den e comunidadnan di Caribe Hulandes. Mas cu un simpel inventario di patrimonio, e iniciativa ta enfoca riba e manera cu cultura ta sigui biba den tradicionnan, arte, musica, idioma, gastronomia y e actividadnan diario di e comunidad.

   Segun e organizadornan, cultura no ta un cos cu ta warda solamente den museo of den buki di historia. Cultura ta biba den hende, den nan memoria colectivo, den nan forma di expresa nan mes y den e manera cu comunidad ta transmiti conocemento y balornan di un generacion pa otro.

   E showcase na Den Haag a ofrece un plataforma pa artistanan di Caribe Hulandes mustra con creatividad ta contribui na preservacion di patrimonio cultural inmaterial. E evento a resalta tambe e papel importante cu arte ta hunga den fortalecemento di identidad y cohesion social.

   Cu Where Culture Lives, Ministerio OCW, partnernan y fondonan cultural ta busca no solamente pa formanan diverso pa documenta cultura, sino tambe crea mas aprecio pa e diversidad cultural cu ta forma parti esencial di Reino Hulandes.

   Danki special na UNOCA pa co-financia e proyecto 'Legado di famia'.