Apertura oficial di Aruba su prome 'business incubator space':  Impact Hub Candidate Aruba

ORANJESTAD (AAN):  Diahuebs ultimo a tuma luga apertura oficial di Aruba su prome Business Incubator space, Impact Hub Candidate Aruba.

Impact Hub ta un organisacion global cu ta consisti di un comunidad di startups, entrepreneurs, fundacionnan y corporacionnan pa asina hunto yuda comunidad prospera, manteniendo tur principio di sostenibilidad pa beneficio di comunidad y mundo.

            Cu apertura di Impact Hub Candidate Aruba, ta marca un stap hopi importante pa e comunidad di entrepreneurs, mas ainda pa Aruba. Ta e comienso di un organisacion independiente, dirigi pa co-fundadornan entrepreneurs, cu lo traha pa trece cambio den e manera con ta haci negoshi na Aruba como tambe dedica na traha hunto cu fundacionnan riba proyectonan social cu tin un impacto pa nos comunidad.

            Impact Hub ta un organisacion global, cu ta consisti di un comunidad di mas di 24.250 entrepreneurs y innovadornan, na 107 impact hubs entre 63 pais rond di mundo.

            E trayectoria di trece un organisacion global a cuminsa na aña 2021 y ta un iniciativa di Fundacion Pa Amor di Nos Aruba (PANA) y ta subsidia pa Pering Group como responsabilidad social corporativo pa asina duna bek na un manera sostenibel na Aruba.

            Impact Hub Candidate Aruba ta wordo maneha pa Fundacion PANA. Durante apertura Presidente di Pering Group, Sr. Irwin Perret-Gentil a enfatisa cu e iniciativa grandi aki, ta demostra cu nan compromiso cu Aruba ta uno duradero.

            ‘Nos semper a kere den e potencial di Aruba y como muestra di nos aprecio nos kier duna bek na comunidad na un manera duradero’, Irwin a splica. Mas cu esey, Pering Group ta dedica na yuda desaroya downtown di Aruba, stimulando ‘Orange Economy’ como tambe ‘Blue Economy’, creando oportunidadnan nobo pa e sector creativo y di pesca.

            E proceso aki ta uno largo pero treciendo tur partido hunto e desaroyador lo continua cu e meta di yuda engrandece comunidad y diversifica economia di Aruba.

            Durante apertura Co-fundadora y General Manager, Sra. Mary-Ann Falconi-Rasmijn a splica e trabounan cu Impact Hub Aruba lo bay eherce cu enfoke primordial riba startups, entrepreneurs, profesionalnan, fundacionnan, sector publico y priva.

            “Nos ta principalmente un Business Incubator space cu lo traha hunto cu startups y entrepreneurs pa duna guia, amplia conocimento, conexion cu otro miembro, cu e solo meta pa acelera crecimento sostenibel pa negoshinan chikito, mediando y grandi.”

            Tambe Impact Hub Aruba ta un coworking space cu lo brinda espacionan ‘shared spaces’, salanan di reunion, ‘work booths’ y oficinanan priva.

            Sra. Falconi a splica encuanto e trayectoria extenso y e importancia di colaboracion entre stakeholders pa exito di un Incubator.

            Prome cu e apertura oficial tur partido a firma un Memorandum of Understanding cu ta specifica e colaboracion pa cu diferente programa di Incubator.