ORANJESTAD (AAN): American Airlines a confronta un dolor di cabez den fin di siman casi mesun estilo cu Southwest Airlines algun siman pasa.
Den fin di siman nan a cancela mas di 1.400 vuelo debi na scarcedad di personal y tambe maltempo riba gran parti di Merca.
Riba Diasabra nan a cancela 551 vuelo, y riba Diadomingo nan a cancela 480 vuelo. Segun American Airlines, riba Diabierna nan a cancela 376 vuelo tambe.
Cu mas mal tempo afectando e sistema, American Airlines personal di cabina a cuminza bira scars debi cu varios miembro di personal no ta logra yega nan siguiente secuencia di vuelo. Nan ta spera di lo sali for di e periodo di operacion iregular aki pronto.
Pesey mes awor cu ta yegando mas cerca pa Dianan di Fiesta, aerolineanan ta buscando forma pa busca mas empleado. American Airlines na Merca mes a bisa cu nan ta aumentando nan personal, cu casi 1.800 personal di cabina extra cu ta regresando, y mas di 600 personal nobo cu a caba di wordo tuma na trabao, y cu ta cuminza bula ta atende pasaheronan pa fin di e aña aki.
Esaki di berdad tabata un Halloween yena cu retraso y vuelonan cancela pa American Airlines.
Dos cancela pa Aruba: Tin di nota cu 2 vuelo pa y for di Aruba tambe a wordo cancela. Un di e vuelonan cu a wordo cancela riba Diadomingo tabata AA-874, y esaki ta un vuelo for di nan hub na Charlotte (North Carolina) directo pa Aruba. Consecuentemente e vuelo di regreso, esta AA-872 a wordo cancela tambe.
Diasabra e vuelo AA-1346 di American Airlines cu ta sali for di Charlotte (North Carolina) a wordo cancela. Automaticamente e vuelo di regreso tambe a keda cancela Diasabra merdia.
Pero riba Diadomingo si e vuelo AA-1346 a bula y a ateriza pa 11:10 am na Aruba. E vuelo di regreso a sali 1:12 pm bek pa Charlotte sin problema.
E vuelo AA-870 di American Airlines cu a sali Diadomingo mainta for di Philadelphia si a yega Aruba pa 12:49 pm. E vuelo di regreso a sali pa 2:00 pm bek pa Philadelphia. Esun di Diasabra tambe a bula normal pa y for di Philadelphia.
E vuelo AA-1028 di American Airlines cu a sali Diadomingo mainta for di Miami si a yega Aruba pa 2:37 pm. E vuelo di regreso a sali pa 3:35 pm bek pa Miami. Esun di Diasabra tambe a bula normal pa y for di Philadelphia.
