Ainda den 2022 e isla aki no por a fix e asunto di Adictonan Ambulante

ORANJESTAD (AAN): Gobierno ta bin, gobierno ta bay, otro ta sinta... y e problema rond di Adictonan Ambulante ta sigui crece diariamente toch.

   E fenomeno cu antes tabata yama ‘Choller’ a cuminza mey-mey di decada di 1980 na Aruba.  Awor den siglo 21, no ta usa e palabra ey mas pero ta bisa ‘Adicto Ambulante’.

   E parti asombroso ta cu varios otro isla, y tambe otro pais den region a logra di resolve e problema aki di Adicto Ambulante!  Tur cos a wordo resolvi.

   Pero na Aruba, keto bay como 40 aña despues ainda no por a haya un solucion!  Keto bay e Adictonan Ambulante ta stroba ciudadanonan di dicidi pa bay haci compras na Playa.  Adictonan Ambulante ta keda molestia turistanan.

   Na Aruba a bisa cu e Adictonan Ambulante por wordo yuda solamente si nan bay di acuerdo pa nan ricibi tratamento pa nan problema.  Tanten cu e pensamento aki sigui tuma lugar di parti nos gobernantenan, e isla aki lo sigui mira crecimento di e cantidad di Adictonan Ambulante riba caya.  Nan ta contribuyendo na nada drechi pa Aruba, y na final di dia ta un peligro pa demas ciudadanonan cu ta cana riba caya, y tambe un peligro pa e unico pilar economico di e isla aworaki.