ORANJESTAD (AAN): Premier Evelyn Wever-Croes a duna di conoce cu na e momentonan aki Aruba ainda no ta negociando cu Hulanda pa loke ta e areglonan di debe.
Ta negocia cu Hulanda cada kwartaal pa asina Aruba por haya loke tin mester pa por sobrebivi, kiermen pa presta, e mandatario a señala.
A cuminsa paga bek pasobra tabata tin un plan prome cu e pandemia ya cu tabata tin un debe cu a redobla durante e gobierno anterior sin cu tabata tin mester. E debe ey caba tabata halto y Gabinete Wever-Croes tabata tin un plan con pa baha e debe aki, a splica.
A agrega cu pa 2039 mester a yega na 50% di e debe bek. Aworaki ta kere cu por yega na esey bek pero mester di algun ahuste.
A cuminsa papia cu Hulanda, pero echt negocia ainda no. Hulanda tambe lo kier warda pa wak con grandi e debe ey ta bay ta y a base di esey lo negocia con ta bay paga e debe tambe, Wever-Croes a duna di conoce.
Finalmente a bisa cu Gobierno ta constantemente na mesa y esaki ta bay den bon consulta cu Hulanda tambe.
