AHATA a organisa seminario "AI at Work: Beyond the Hype" na su miembronan

ORANJESTAD (AAN):  Aruba Hotel & Tourism Association (AHATA) a organisa un seminario gratuito pa su miembronan titula "AI at Work: Beyond the Hype",

diseña pa introduci su participantenan na e potencial di Inteligencia Artificial (AI) den cada uno di nan companianan. Durante e evento, dos experto local di AI, Sr. Ross Brezovar, doño di Aruba ROI, y Sr. Laurens Ras, AI Conversion Consultant y miembro di Impact Hub Aruba, a presenta informacion valioso riba con AI por beneficia y mehora e operacion di un compania.

Sr. Ross Brezovar a duna un resumen general di kico ta AI y su usonan pa logra mas eficiencia. Sr. Laurens Ras a enfoca mas riba ehempel especifico di con por implementa AI pa soluciona cierto problema relaciona cu eficiencia y servicio. E meta di e seminario ta pa reconoce con AI por asisti empleadonan y facilita procesonan. 

Como un paso adicional pa asisti su miembronan, AHATA ta ofreciendo sesionnan individual unda tin e oportunidad pa ricibi un “coaching session” directamente cu e expertonan pa explora solucionnan di AI specifico pa e retonan den nan compania. Di e manera aki e asociacion por sigui duna su miembronan mas recurso y comparti conocemento cu ta promove exito y productividad comercial.

E asociacion ta spera cu e uso di avance tecnologico por crece y contribui na fortalece nos pilar economico, aportando na un futuro mas eficiente y innovativo.