AGRIFUND a pone 3 miyon Florin disponibel na fiansa pa e sector di agricultura

Geoffrey Wever:

*Seis agricultor local a ricibi conhuntamente 735 mil florin na fiansa 

ORANJESTAD (AAN):  Durante inauguracion di e fondo agricola AGRIFUND,  seis (6) comerciante agricultor a ricibi conhuntamente  AFL 735,000 Florin na fiansa, na un interes sumamente abou di 2%. E Agrifund, cu un suma di Afl. 3 miyon pa financia e sector Agricultor comercial, ta un iniciativa di Minister Geoffrey Wever, Minister Ursell Arends y Qredits Aruba, pa stimula agricultura como pilar economico nobo y yuda construi e seguridad alimenticio Arubano anhela despues di 2020.

            Awo sector Agricultor a ricibi un herment mas pa juda e comercialisacion efectivo di e sector y contribui grandemente na e seguridad alimenticio di nos pais esta Afl. 3 miyon pa financiamento di nan actividadnan comercial.

            Minister Geoffrey Wever, hunto cu Minister Ursell Arends y Sra. Nathaly Harms, representante di Qredits Aruba y  Sr. Jeremy Croes, director di Aruba Agri Development Company N.V., ta parti di e momento historico cu e inauguracion di AGRIFUND. E fondo aki lo yuda grandemente den enfrenta e retonan den agricultura comercial: e necesidad pa financiamento accesibel adapta na e necesidad di e comerciante den sector primario.

            Minister Geoffrey Wever, ta consciente cu tin mas reto y tin oido pa esakinan. Pa hopi tempo a indentifica diferente reto pa comercialisacion di produccion local, e.o accesibilidad di financiamento, disponibilidad di tereno, costo di utilidad, escacez di conocemento empresarial y tecnologico. Sinembargo, Minister Wever ta enfatisa cu financiamento pagabel tabata uno di esnan mas grandi den e sector. E ta spera cu e inciciativa aki por ta e catalysador pa mas financiamento den futuro por medio di expansion di e fondo aki, of como un posibel “springplank” pa e instituonan financiero local.

            Siman pasa Minister Geoffrey Wever, despues di un proceso legal di mas di 2 aña, a logra modernisa y converti un empresa di Land Aruba, cu pa añas no tabata activo y cu tabata dispone di mas o menos AFL 1.200.000 Florin cual anteriormente tabata ‘frozen’. Awo, hunto cu Qredits Aruba a logra lansa un fondo di Afl. 3 miyon na disposicion di e sector agricola.

            “Nos mision ta pa elimina e bareranan cu ta impedi crecemento di un industria agricola comercial na Aruba. AGRIFUND, ta e base fundamental pa stimula e industria aki,” Minister Wever a indica.

            Minister Wever y Minister Arends ta gradici Sr. Elwin Groeneveld y Sra. Nathaly Harms di Qredits Aruba pa e confiansa, pasenshi y pa kere den Aruba y den Aruba su sector primario como pilar economico. "Sin Qredits Aruba nos no lo por a logra esaki", minister Wever ta termina.