Admiracion mundial pa avancenan grandi cu China ta logrando ultimo añanan

Na Aruba por nota esaki tambe

ORANJSTAD (AAN): E siman aki por a mira comentario rond mundo, despues cu companianan tecnologico na China a demostra cu awor ta nan a bira e ‘Silicon Valley’ pa avance tecnologico rapido cu antes por a wordo mira solamente na otro paisnan di hemisferio occidental.

   No ta djis den tecnologia, sino tambe den produccion di materialnan industrial, y awor tambe cu tecnologia automotriz.

   China ta experienciando avance tecnologico cu pasonan gigantesco, specialmente den Inteligencia Artificial (AI), mecanismo robotico, 5G, vehiculonan electrico, y energia sostenibel.  China na un forma rapido a comberti caba den un hub global di inovacion.

   E ta wordo empuha door di sosten gubernamental fuerte, inversionnan den investigacion y desaroyo di ekipo, y produccion ta dirigi riba mercadonan grandi.

   Companianan Chines manera Huawei, Baidu, Tencent, y BYD ta logrando avancenan importante, pasando di e fabricacion di productonan di calidad abao, y awor nan productonan ta di balor grandi.  E inovacionnan aki ta transformando sectornan cu ta varia for di exploracion espacial, te na fabricacion inteligente, y tur esaki tin un impacto global significante den cadenanan di suministro, comercio electronico, y servicionan digital.

   Recien por a sigui noticianan procedente di Venezuela, unda President Nicolas Maduro a presenta dilanti pantaya di TV nacional, pa mustra cu el a ricibi un smartphone modelo Huawei Mate X6 como regalo di Gobierno di China.  Pasobra e smartphone aki ta di tal forma fabrica, cu ningun agencia di seguridad, di spionahe, ni CIA y tampoco FBI no por ‘hack’ e telefon aki.  Pasobra e no ta fabrica cu ningun tipo di microchip, ni sistema di operacion, ni ningun app aden cu ta fabrica na Merca.

   President Maduro a bisa cu el a haya e telefon regalo for di president Xi Jingping di China.  Den mic, President Maduro a indica cu e Huawei aki ta “e mihor telefon na mundo”, y a sigura cu “Mericanonan no por hack esaki, ni nan avionnan di spionahe, y ni nan satelitenan”.

   Hopi a kere cu ora cu Merca a prohibi uzo di ekipo marca Huawei, cu e compania lo sucumbi.  Pero awor e productonan di Huawei ta sobresaliendo cu nan smartphone cu ta hopi avanza, y tin peticion na monton for di otro paisnan cu si kier nan.  Special ora cu Huawei a introduci e Huawei Mate XT cu ta habri 3 biaha y bira uno cu pantaya gigantesco.  E demanda di clientenan pa e smartphone aki ta asina grandi, te cu awor Huawei a saca un modelo mas nobo, esta e Huawei Mate XTs cu tambe ta dobla tres biaha pa presenta un pantaya grandi.

   Industria di vehiculo: Ademas di e tecnologia di smartphone, China a bin ta desaroyando autonan electrico hopi avanza cu inovacion pa e chauffeur y pasaheronan cu ta sobrepasa tur fantasia cu por existi.  E compania BYD mes ta produciendo aworaki mas auto electrico compara cu tur otro compania mundial.  Ta numeroso compania Chines mas a lanta, y nan dealernan ta lantando rond mundo pa bende y service e autonan.  Algun compania tin un sistema robusto caba pa duna servicio y suministra pieza, pasobra esey tabata un di e dolornan di cabez cu compania Chines pa obtene pieza.  Pero ya varios compania grandi a logra soluciona esey caba, y awor ta e companianan chikito poco-poco ta yegando na e nivel pa satisface clientenan rond mundo cu servicio mas rapido.

   Hopi observador a indica cu nan ta impresiona cu e calidad di fabricacion di auto y vehiculo na China.  Autonan cu ta core hopi suave, ta spaar riba uzo di gasolin, y cu alcance leu cu un solo charge di bateria.  Na Latino America e popularidad di autonan marca BYD ta enorme caba, y clientenan ta satisfecho cu ne.  China ya ta un potente exportador di tecnologia automotriz, cu ta casi mes bon, y tin biaha hasta mihor cu esnan ya existente na Merca, Europa, Koreano, y Japon.

   Na Aruba tambe, ya caba por mira cu tin hopi persona ta canando rond cu smartphone marca Huawei y tambe Xiaomi.  Y di vehiculonan electrico of esnan di gasolin produci na China, tambe tin bastante ta core rond.  Desaroyonan den microprocessor ta wordo empuha tambe di tal magnitud cu bo por cumpra awendia hopi aparato pa pone den cushina, den oficina, y hasta den sala pa asina bo cas tambe ta completamente moderno y eficiente, y tur esey danki na avancenan na China.