ORANJESTAD (AAN): E compania local ABC Tours & Attractions ta orguyoso di anuncia su mas recien reconocimento den e 'Traveler's Choice Awards 2024’ di Tripadvisor.
E compania a pone Aruba resalta unabes mas entre mas di 8 miyon excursion cu e reconocimento di #18 'Best of the Best' operador turistico rond mundo, sigurando e posicion #1 den Caribe atrobe y reafirmando su status como lider den e industria di biahe y turismo na Aruba.
Menos cu 1% ta logra e meta aki, loke ta haci e reconocimento aki mas prestigioso.
E premionan aki, otorga pa e plataforma di biahe mas grandi na mundo, ta refleha e evaluacion y experiencianan sobresaliente comparti pa e bishitantenan di tur parti di mundo. ABC Tours Aruba semper a sa di duna un servicio excepcional, vehiculonan inovativo y aventuranan inolvidabel, cu a gana e luga entre e miho di mihonan.
E tour cu a ricibi e premionan prestigioso aki ta e ‘Island Ultimate Jeep Safari Tour'. E aventura di henter un dia ta hiba e bishitantenan riba un biahe emocionante den e luganan mas bunita y isola di Aruba.
E puntonan di mas importante di e tour ta inclui un baño refrescante den e famoso piscina natural di e isla, explorando e bunitesa di Parke Nacional Arikok, bishitando e iconico California Lighthouse cu bista panoramico, y relahando riba e santo blanco di Baby Beach.
E bishita ta inclui tambe un cuminda delicioso traha na cas, cu ta duna e bishitantenan un smaak di e sabornan local. E 'Island Ultimate Jeep Safari Tour' ta combina e emocionante experiencia di stuur e jeepnan den terenonan di aventura cu e comodidad di guianan experto, cu ta garantisa un experiencia sigur y memorabel pa tur bishitante.
"Nos ta sumamente honra di ricibi e premionan prestigioso aki", Marvin M. Kelly, CEO di ABC Tours Aruba a bisa . "E reconocimento aki ta un testimonio di e trabou duro, dedicacion y pasion di henter nos team. Nos ta dedica na brinda nos bishitantenan experencianan extraordinario y e premiacionnan aki ta motiva nos pa sigui eleva e nivel den e industria di turismo. Nos ta dedica na haci Aruba nos "One Happy Island" briya y lo sigui haci esey", a expresa.
"Na ABC Tours Aruba, nos ta motiva pa un pasion pa aventura y excelencia. Nos ta continuamente innova nos fleta di jeeps y UTV's pa garantisa e mas halto standard di comfort y seguridad.
Nos adicion nobo, e 'Bat Mobile', ta ehempel di nos compromiso pa keda dilanti y entrega experiencianan sin igual. Pa continuamente mehora nos fleta y servicionan, nos ta percura pa duna cada huesped un bishita cu ta igual di inolvidabel como e isla mes", Kelly a agrega.
Loke a cuminsa como un negoshi local di 3 persona na aña 1995, awe ta un ehempel bibo cu ta refleha con nos Arubianonan por triunfa na nivel mundial y ta haci un aporte grandi na Aruba como producto turistico.
